اردو پارک کو قابضین اور نشہ آور لوگوں سے پاک کرانے کی مہم تیز

یوں تو دہلی کئی بار اجڑی اور کئی بار بسی لیکن ایک دور تھا جب دہلی فصیل بند شہر ہوا کرتا تھا اسے مغل بادشاہ شاہجہاں نے جمنا کنارے 17 ویں صدی میں بسایا تھا، یہاں بازار، رہائشی علاقے، نہریں اور باغات سب کچھ تھے۔ تاہم دھیرے دھیرے آبادی بڑھتی گئی اور سب کچھ ایک کانکرٹ کے جنگل میں تبدیل ہوگیا۔

ایسا ہی کچھ حال مسجدِ جہاں نما کے پہلو میں بنے اردو پارک کا ہے، جو کبھی سر سبز و شاداب ہوا کرتا تھا وہ اب بنجر زمین معلوم ہوتا ہے یہاں نہ صرف غیر قانونی طور پر نشہ آور شے فروخت ہوتی ہیں بلکہ دیگر برے کام بھی انجام دیے جاتے ہیں۔

ای ٹی وی بھارت کے نمائندے نے مقامی افراد سے بات کی جس میں انہوں نے بتایا کہ سب سے زیادہ نقصان ان پارکوں کو شیلٹر ہوم سے ہوا ہے۔

جب سے یہاں رین بسیرے نصب ہوئے ہیں تب سے علاقہ کے بچے کھیلنے کودنے سے محروم ہو گئے ہیں۔

اب پرانی دہلی کے پاس کوئی بھی ایسا پارک نہیں ہے جہاں وہ سیر و تفریح کے ساتھ صاف آب و ہوا حاصل کر سکیں۔ اسی سے متعلق دہلی انجمن کے صدر ذاکر خان نے وزیراعلی، لیفٹیننٹ گورنر اور ڈی سی پی سی آر سمیت متعدد افسران کو خط لکھ کر ان پارکوں کی حالت بہتر کرنے اور انہیں بچوں کے لیے کھولنے کی درخواست کی ہے۔

ساتھ ہی انہوں نے شاہی امام سید احمد بخاری سے بھی اپیل کی ہے کہ وہ مسجد کے اطراف سے غیر قانونی قبضہ اور پارکوں میں پھیلی گندگی کو صاف کرانے کے لیے آگے آئیں۔