نئی دہلی: عام آدمی پارٹی کے رہنما اور پنجاب سے راجیہ سبھا کے رکن راگھو چڈھا پر پارلیمنٹ کے باہر کوے کے حملے کا مذاق اڑاتے ہوئے بی جے پی کے ایک ٹویٹ پر عآپ کے رہنما کی طرف سے بھی اتنا ہی سخت ردعمل آیا۔ دراصل بی جے پی دہلی کے آفیشل ٹویٹر ہینڈل نے تصویروں کا ایک کولاج شیئر کیا ہے جس میں چڈھا کو کوا چونچ مارتے ہوئے دکھایا گیا ہے۔ ان تصویر کے ساتھ بی جے پی نے لکھا کہ جھوٹ بولے کوا کاٹے۔ بی جے پی نے اپنے ٹویٹ میں مزید کہا کہ ہم نے آج تک یہ صرف سنا تھا آج یہ دیکھ بھی لیا کہ کوے نے جھوٹے کو کاٹا۔
تصویروں کے کولاج میں دیکھا جا سکتا ہے کہ ایک کوے نے ان پر حملہ کر دیا ہے۔ دراصل یہ حملہ اس وقت ہوا جب راگھو چڈھا پارلیمنٹ کے باہر فون کال پر بات کرنے میں مصروف تھے۔ تبھی ایک کوا ان کے سر پر حملہ کرنے کی کوشش کرنے لگا۔ اگرچہ بی جے پی نے یہ واضح نہیں کیا کہ یہ تصویر کب لی گئی تھی، لیکن یہ پوسٹ جلد ہی وائرل ہوگئی اور عآپ ایم پی کی طرف سے بھی اس پر فورا ردعمل کا اظہار کیا اور انھوں نے رامائن کے حوالے سے جواب دیا۔
راگھو چڈھا نے لکھا کہ "رام چندر کہہ گئے سیا سے ایسا کَل یُگ (زمانہ) آئے گا، ہنس چُگے گا دانا اور کوا موتی کھائے گا" چڈھا نے اپنے ٹویٹ میں بی جے پی کے ٹویٹ کی ہی طرح ایک لائن شامل کرتے ہوئے لکھا کہ آج تک صرف سنا تھا، آج دیکھ بھی لیا۔
سوشل میڈیا پر یہ طنزیہ مذاق ایک ایسے وقت میں ہوا جب اپوزیشن پارٹیاں مانسون سیشن میں روزانہ حکمراں جماعت کے لیڈر سے منی پور جھڑپوں پر بیان دینے کا مطالبہ کر رہی ہیں اور وزیراعظم اس معاملے پر جواب دینے کے بجائے اپوزیشن جماعتوں کے نئے محاذ کے نام انڈیا پر پر جواب دینے میں لگے ہوئے ہیں۔
