نئی دہلی:بی جے پی کے ایک سرکردہ لیڈر نے وزیر اعظم مودی کی قیادت میں قومی جمہوری اتحاد (این ڈی اے) حکومت کے نو سال مکمل ہونے کے موقع پر منعقدہ ایک پروگرام میں کہاکہ ہماری پارٹی کو کسی سے کوئی ڈرا نہیں ہے۔ یہ پوچھے جانے پر کہ کیا تقریباً 19 اپوزیشن جماعتوں کی جانب سے نئی پارلیمنٹ کی عمارت کے افتتاح کے بائیکاٹ سے آنے والے لوک سبھا انتخابات میں بی جے پی کے خلاف متحدہ اپوزیشن کی ریلی کو چیلنج کرنے کا امکان ہے، پارٹی لیڈر نے کہا کہ ہاں، یہ سچ ہے کہ وہ پارٹیاں عام انتخابات میں ایک ساتھ آسکتی ہیں۔ لیکن ملک میں ہمارے ووٹروں کے ذہن میں مسٹر مودی کی تصویر نقش ہے اور وہ کسی بھی انتخاب میں مسٹر مودی کی شبیہ اور کامیابیوں کو ذہن میں رکھ کر ووٹ دیتے ہیں۔
تاہم، انہوں نے اس بات سے اتفاق کیا کہ بی جے پی کے زمینی کارکنوں کے کام اور رویے کا اثر ہوتا ہے، اس لیے جب بھی پارٹی کے اعلیٰ رہنما تنظیمی میٹنگوں میں جاتے ہیں، وہ کارکنوں کو سمجھاتے ہیں کہ ووٹر بھی ان کے کام کے رویے سے متاثر ہوتا ہے۔ اس لیے وہ معاشرے میں سب کے ساتھ گھل مل جاتے ہیں اور حسن سلوک کو برقرار رکھتے ہیں۔ انہوں نے کہا کہ وزیر اعظم مودی خود بھی کارکنوں کو یہی پیغام دیتے ہیں۔
ریاستی اسمبلیوں اور لوک سبھا کے آئندہ انتخابات کے لئے بی جے پی کی تیاریوں کے بارے میں پارٹی لیڈر نے کہا کہ بی جے پی اپنے نو سال کے کام کے تقابلی تجزیہ کی بنیاد پر عوام کے درمیان جائے گی۔ بدعنوانی سے پاک، غریبوں پر مبنی اور ترقی پر مبنی طرز حکمرانی کو سامنے رکھتے ہوئے پارٹی کا پیغام یہ ہوگا کہ 'پائی پائی سے ملک کی بھلائی'۔
علاقائی مسائل پر سوالات کے جواب میں بی جے پی لیڈر نے کہا کہ وہ مغربی بنگال میں پنچایتی انتخابات اور لوک سبھا انتخابات پوری طاقت کے ساتھ لڑے گی اور توقع سے بہتر نتائج لائے گی۔ ان کے مطابق مغربی بنگال میں پنچایتی انتخابات میں بی جے پی کارکن ہر قربانی دیں گے، لیکن پوری طاقت کے ساتھ الیکشن لڑیں گے۔ انہوں نے کہا کہ تشدد کے ساتھ ساتھ یہ بھی ہوگا کہ بی جے پی امیدواروں کو پرچہ نامزدگی داخل نہیں کرنے دیا جائے گا، لیکن اس کے باوجود ہم پوری صلاحیت کے ساتھ مقابلہ کریں گے۔
چھتیس گڑھ کے بارے میں ذرائع نے بتایا کہ وہاں پارٹی اپنی خامیوں کو دور کرے گی اور وہاں بھی ہم دوبارہ اقتدار میں آئیں گے۔ مدھیہ پردیش کے بارے میں پوچھے جانے پر انہوں نے کہا کہ ہر الیکشن چیلنجنگ ہوتا ہے، لیکن ہم وہاں موجودہ قیادت میں مقابلہ کریں گے اور وہاں بھی پارٹی کی خامیوں کو دور کرکے جیتیں گے۔
یہ بھی پڑھیں:AIMIM And BJP Councillors Clash میرٹھ میں اے آئی ایم آئی ایم اور بی جے پی کونسلرز کے درمیان جھڑپ
اس موقع پر بی جے پی کے صدر جگت پرکاش نڈا، وزیر دفاع راج ناتھ سنگھ، وزیر داخلہ امت شاہ، وزیر خزانہ نرملا سیتارامن، وزیر تجارت پیوش گوئل، وزیر ریلوے اور مواصلات کے وزیر اشونی ویشنو، اطلاعات و نشریات کے وزیر انوراگ ٹھاکر، خواتین اور بچوں کی ترقی کی وزیر اسمرتی ایرانی موجود تھیں۔
یواین آئی
