پریس کانفرنس سے کانگریس کے سینئر رہنما پون کھیرا نے خطاب کرتے ہوئے مرکزی حکومت کو تنقید کا نشانہ بنایا اور کہا کہ ملک کے حالات اس قدر ابتر ہوچکے ہیں کہ خود وزیر داخلہ شمالی ریاستوں میں جانے کی ہمت نہیں کر پارہے ہیں۔
پون کھیرا نے آج پولیس کی جانب سے جامعہ ملیہ اسلامیہ میں داخل ہوکر طلبا کی پٹائی کرنے پر شدید ردعمل کا اظہار کرتے ہوئے پورے واقعہ کی جانچ کرنے کا مطالبہ کیا ہے۔ انہوں نے اس پورے واقعہ کی ذمہ داری امت شاہ پر عائد کی۔
انہوں نے کہا کہ بی جے پی ہمیشہ اہم موضوع سے عوام کی توجہ ہٹانے کےلیے ہندو۔مسلم کو باٹنے کا کام کرتی ہے۔ انہوں نے نوجوانوں پر پولیس ظلم کو ناقابل قبول بتایا ہے۔
اس موقع پر خطاب کرتے ہوئے کانگریس کی خاتون رہنما راگنی نائک نے کہا کہ گذشتہ 6 سال کے دوران بی جے پی حکومت نے طلبا کی آواز کو دبانے کا کام کیا ہے۔
انہوں نے طلبا کے پرامن احتجاج کو دبانے کےلیے پولیس کا استعمال کرنے کا مودی حکومت پر الزام لگایا۔
راگنی نائک نے کہا کہ کانگریس پارٹی ملک کے طلبا کے ساتھ ہیں اور ان پر ہونے والے مظالم کے خلاف آواز بلند کی جائے گی۔
