نئی دہلی: عام آدمی پارٹی نے الزام لگایا ہے کہ دہلی میونسپل کارپوریشن کے میئر کے انتخاب میں شکست کے بعد ناراض بی جے پی کونسلروں نے میئر شیلی اوبرائے پر حملہ کرنے کی کوشش کی ہے۔شیلی اوبرائے پر حملے کی کوشش کے بعد دہلی کے وزیر اعلی اروند کیجریوال نے کہا کہ یہ حیران کن اور ناقابل قبول ہے۔ دہلی میونسپل کارپوریشن کی میئر شیلی اوبرائے نے ٹویٹ کیا کہ سپریم کورٹ کے حکم کے مطابق اسٹینڈنگ کمیٹی کا انتخاب ہو رہا تھا اس وقت بی جے پی کونسلروں نے ان پر حملہ کرنے کی کوشش کی۔ عام آدمی پارٹی کی سینئر لیڈر آتشی نے کہا کہ نہ صرف بی جے پی کی خواتین کونسلروں بلکہ مرد کونسلروں نے بھی اسٹیج پر جا کر شیلی اوبرائے پر حملہ کرنے کی کوشش کی ہے۔ اسٹینڈنگ کمیٹی کے انتخابات کے لیے ہر بار جب ووٹنگ ہوتی ہے، بی جے پی کے کونسلر غنڈہ گردی شروع کر دیتے ہیں۔
ایم ایل اے آتشی نے کہا کہ اگر بی جے پی الیکشن ہار گئی ہے تو انہیں عوام کا مینڈیٹ قبول کرنا پڑے گا۔ وہ بار بار غنڈہ گردی کررہے ہیں۔ آج چوتھی تاریخ کے بعد میئر کا انتخاب ممکن ہو گیا ہے لیکن اب اسٹینڈنگ کمیٹی کے انتخابات میں بی جے پی غنڈہ گردی کر رہی ہے۔ ہم بھارتیہ جنتا پارٹی سے کہنا چاہتے ہیں کہ اگر آپ الیکشن ہار گئے ہیں تو عوام کے مینڈیٹ کو قبول کریں۔ غنڈہ گردی کے ذریعے اپنی حکومت بنانے کی کوشش نہ کریں۔ واضح رہے کہ ایوان کی کارروائی شروع ہوتے ہی ہنگامہ شروع ہو جاتا ہے۔ میئر کی جانب سے تمام تر کوششوں کے باوجود رات گئے تک اسٹینڈنگ کمیٹی کا انتخاب نہ ہوسکا۔ عام آدمی پارٹی کا کہنا ہے کہ چاہے ہمیں ساری رات ایوان میں بیٹھنا پڑے لیکن ہم آج ہی الیکشن کرائیں گے۔
یو این آئی
