قومی دارالحکومت دہلی کے آنند وہار ٹرمنل سے 15 جون کے بعد ٹرینیں نہیں چلیں گی۔
اطلاعات کے مطابق 'پلیٹ فارم نمبر 1 سے 7 کو آئسولیشن کوچوں کی تعیناتی کے لئے ریزرو کیا گیا ہے۔ اس وقت دہلی کے پاس کل 54 کوچ ہیں، جنہیں شکوربستی میں کھڑا کیا گیا ہے۔'
دراصل ابھی دہلی کے آنند وہار ٹرمنل سے کل 5 ٹرینیں چلائی جارہی ہیں۔ فی الحال ان تمام ٹرینوں کو آنند وہار سے پرانی دہلی ریلوے اسٹیشن منتقل کیا جارہا ہے۔ 16 جون سے یہ تمام ٹرینیں پرانی دہلی ریلوے اسٹیشن سے چلائی جائیں گی۔
واضح رہے کہ 'آج وزیر داخلہ امت شاہ نے وزیر اعلی اروند کیجریوال اور دیگر رہنماؤں سے ملاقات کی۔ اجلاس کے دوران دہلی میں بیڈز کو بڑھانے پر زور دیا گیا ہے۔ جس کے بعد دہلی کو 500 ریلوے کوچ بھی دیئے جارہے ہیں۔ اس لئے آنند وہار میں یہ انتظامات کیے گئے ہیں۔'
