سوربھ بھاردواج نے کہا کہ 'بی جے پی کے ذریعہ جس کونسلر کو جنوبی دہلی میونسپل کارپوریشن میں ہاؤس لیڈر اور میئر کی ذمہ داری دی گئی ہے، وہ دونوں کونسلر مکمل طور پر بدعنوانی میں ملوث ہیں۔ اپنے اقتدار کے آخری سال میں بی جے پی عوام سے زیادہ سے زیادہ پیسے لوٹنا چاہتی ہے۔
انہوں نے کہا کہ جنوبی ایم سی ڈی لیڈر اِندرجیت سہروت مہیپال پور سے پہلی بار کونسلر منتخب ہوئے تھے۔ الیکشن کمیشن کو دیئے گئے حلف نامے کے مطابق ان کے پاس ایک کروڑ 24 لاکھ کے منقولہ اثاثے تھے جو بڑھ کر 2 کروڑ ہوگئے ہیں۔ انہوں نے دو برسوں میں کروڑوں کی جائیداد حاصل کرلی ہے اسی طرح مکیش سوریان جنہیں میئر بنایا گیا تھا انہوں نے متعدد بار سرکاری اہلکاروں سے بدتمیزی کی اور مار پیٹ کی۔
سوربھ بھاردواج نے عام آدمی پارٹی کے قومی دفتر میں پریس کانفرنس کرتے ہوئے ایس ڈی ایم سی میں بی جے پی حکومت کے خلاف بہت سارے سنگین الزامات عائد کرتے ہوئے کہا کہ بی جے پی نے اپنے دور اقتدار کے آخری سال میں بدعنوان کونسلروں کو ایک بڑی ذمہ داری دے دی ہے تاکہ دہلی کے عوام کو زیادہ سے زیادہ لوٹا جاسکے۔
