قومی دارالحکومت دہلی کے براڑی اسمبلی حلقے میں تعمیر کردہ 800 بستروں پر مشتمل سرکاری ہسپتال کا افتتاح ریاستی حکومت کی جانب سے کیا جارہا ہے، اس موقع پر دہلی کے ریاستی وزیر صحت ستیندر جین اور مقامی رکن اسمبلی موجود ہوں گے۔
واضح رہے کہ عالمی وبا کو دیکھتے ہوئے پہلے یہاں کورونا سے متاثر مریضوں کے لیے صحت کی خدمات فراہم کی جائیں گی، اس کے بعد براڑی کے اس ہستال کو مکمل طور پر عوام کے لیے ہر قسم کے علاج کے لیے وقف کردیا جائے گا۔
مقامی لوگوں کا کہنا ہے کہ اس ہسپتال کی تعمیر کے لیے بہت جدوجہد کرنی پڑی، کئی بار اس کی سنگ بنیاد رکھی گئی، لیکن اب اس ہسپتال کے تعمیر کا سہرا کجریوال حکومت کو جاتا ہے۔
واضح رہے کہ اس ہسپتال کا سنگ بنیاد سنہ 2013 میں دہلی کی سابق وزیراعلی شیلا دکشت نے کیا تھا اور اس کے بعد اس ہسپتال کی تعمیر میں تقریباً سات برس لگ گئے۔
علاقے کے لوگ اب امید کر رہے ہیں کہ ہسپتال تعمیر ہونے کے بعد براڑی اسمبلی کے لوگوں کے ساتھ ساتھ آس پاس کے علاقے کے لوگوں کو بھی فائدہ ملے گا، کیوں کہ اس ہدپتال کے علاوہ آس پاس کا کوئی بڑا سرکاری ہسپتال نہیں ہے۔
انہوں نے کہا کہ اگر کوئی واقعہ پیش آتا ہے یا کسی کو فوری طور پر علاج کے لیے ہسپتال لے جانے کی ضرورت ہوتی ہے تو قریب ترین نریلا کا ستیہ وادی راجہ ہریش چندر ہسپتال اور شمالی دہلی میں ہندو راؤ ہسپتال ہے۔
انہوں نے کہا کہ اگر آپ نجی اور بڑے ہسپتالز کے بارے میں بات کرتے ہیں تو پھر مریضوں کو آئی ایس بی ٹی کے قریب سینٹ پرمانند ہسپتال لے جانا پڑتا ہے، جس کی وجہ مریض کے علاج میں تاخیر کی وجہ کئی بار ایسا ہوا ہے کہ مریض نے دم توڑ دیا ہے۔
