کشتی پلٹنے سے دو کی موت، ایک لاپتہ

ریاست چھتیس گڑھ کے ضلع دھمتری کے اکلاڈونگری تھانہ علاقے میں واقع گنگریل باندھ میں کشتی کی سواری کے دوران ایک کشتی پلٹ جانے سے دو بچیوں کی ڈوبنےسے موت ہوگئی اور ایک دیگر لاپتہ ہے، جس کی تلاش کی جارہی ہے۔اس واقعہ میں دو خواتین کو صحیح سلامت بچا لیاگیاہے۔

چھتیس گڑھ کے کانکیر اور نارائن پور ضلع کے کچھ لوگ چاراما میلا دیکھنے آئےتھے۔ وہاں سے سب اپنے رشتہ دار کے یہاں نیا کولیاری پہنچے۔ جہاں سے انہوں نے جہاز رانی کے دوران منصوبہ بنایا۔

کل شام خواتین، بچے سمیت 10لوگ سوار ہوکر کشتی کی سواری سے لطف اندوز ہو رہے تھے اسی دوران تیز ہواؤں کے چلنے اور کشتی میں پانی بھرنے سے کشتی پلٹ گئی۔

حادثے میں سمترا ناگ(16)اور نیویدیتا کانگے(03)کی ڈوبنے سے موت ہوگئی جبکہ پانچ برس کی لکشمی منڈاوی لاپتہ ہے، جس کی تلاش کی جارہی ہے۔

وہیں میرابائی منڈاوی اور درگیشوری کانگے کو ڈوبنے سے بچا لیا گیا ہے۔ دونوں زخمیوں کو علاج کے لیے چاراما ہسپتال میں داخل کرایا گیا ہے۔ دونوں ملاح اور دیگر لوگ کسی طرح بچ کر باہر آگئے۔