بڈگام: وسطی کشمیر کے بڈگام ضلع کے سب ضلع چاڈورہ کے وتھورا علاقے میں اتوار کی دوپہر بعد نالہ دودھ گنگا سے ایک خاتون کی لاش برآمد کی گئی۔ ذرائع نے بتایا کہ واتھورا کھیل کے میدان کے قریب مقامی لوگوں کو دودھ گنگا نالے میں ایک خاتون کی لاش دکھائی دی، بعد ازاں لوگوں نے اس لاش کے بارے میں نزدیکی پولیس اسٹیشن کو اطلاع دی۔
مقامی لوگوں نے متوفی خاتون کی شناخت جمیلہ کے نام سے کی ہے جو کہ قریب کے گاؤں بچھرو کے حاجی احمد وگے کی بیوی ہے جو مبینہ طور پر نالہ شالی گنگا پر قائم عارضی پل کو عبور کرتے ہوئے پھسل گئی جب وہ کھیتوں میں جا رہی تھی۔ پولیس نے اطلاع ملتے ہی جائے وقوع پر اپنی ایک ٹیم کو روانہ کیا جس نے لاش کو موقعے سے برآمد کر لیا جب کہ اس ضمن میں مزید تحقیقات شروع کر دی گئی ہیں۔ وہیں خاتون کی موت کی خبر پھیلتے ہی بچھرو گاؤں میں واقع اس گھر میں صف ماتم بچھ گئی۔ اس اچانک موت سے لواحقین صدمے میں ہیں۔ مقامی لوگ بھی تعزیت کے لیے متوفیہ کے گھر پر جمع ہوگئے۔
یہ بھی پڑھیں: Dead Body Found In Budgam بڈگام میں کمسن لڑکے کی لاش پراسرار حالت میں برآمد
یہاں یہ بات واضح رہے کہ ضلع بڈگام کے اکثر دیہات میں ابھی بھی بیشتر ندی نالوں پے لکڑی یا کچے پل بنے ہوئے ہیں جو بارش یا برف باری کے دوران حادثات کی وجہ بن جاتے ہیں۔ پچھلے چند دنوں میں یہ دوسری اموات ہے۔
