منشیات کے خلاف بڈگام پولیس کی کارروائیاں جاری ہیں، بڈگام پولیس نے ایک اور منشیات فروش کو گرفتار کرکے اس کی تحویل سے براؤن شوگر سمیت پچاس ہزار نقدی بھی ضبط کر لی ہے۔
پولیس نے منشیات فروش کو حیدرپورہ چوک سے گرفتار کیا ہے۔ پولیس کے مطابق ہمہامہ، بڈگام پولیس اسٹیشن کی پارٹی نے چوک میں ناکہ قائم کیا تھا اور اس دوران ایک گاڑی کو روک کر تلاشی لی گئی۔
جموں و کشمیر پولیس نے بتایا کہ تلاشی کے دوران چار گرام براؤن شوگر اور پچاس ہزار نقدی بر آمد کرکے منشیات فروش کو حراست میں لے لیا گیا۔
پولیس نے مزید کہا کہ ’’جرم میں استعمال کی گئی گاڑی کو بھی ضبط کیا گیا ہے۔‘‘
- مزید پڑھیں: ایل جی کے مشیر بصیر خان کا دورۂ بڈگام
گرفتار کیے گئے شخص کی شناخت بٹہرہ، بڈگام کے مختار احمد وانی کے طور پر ہوئی ہے، پولیس نے اس معاملے میں ایف آئی آر درج کرکے مزید تفتیش شروع کردی ہے۔
بڈگام پولیس نے لوگوں سے ایک بار پھر منشیات کے خلاف مہم میں پولیس کا ساتھ دینے اور منشیات فروشی سے وابستہ افراد کی نشاندہی کرکے پولیس کو اطلاع دینے کی اپیل کی ہے، تاکہ ’’سماج کو منشیات جیسی بری لت سے پاک کیا جا سکے۔‘‘
