انتظامیہ کی جانب سے لوگوں کو بنیادی سہولت پہنچانے کی غرض سے تعمیراتی کاموں خصوصا سڑکوں کی تعمیر و کشادگی پر ہزاروں کروڑ روپے خرچ کیے جاتے ہیں تاہم بعض مقامات پر غیر منصوبہ بند کام انجام دیے جانے پر لوگوں نے نارضگی کا اظہار کیا ہے۔
سوئی بُگ بڈگام کو پارمپورہ سرینگر سے ملانے والی سڑک پر انتظامیہ کی جانب سے برسوں بعد میگڑمائزیشن کا کام شروع کیا گیا تاہم سڑک پر بجلی کھمبوں کو کناروں پر نصب نہ کیے جانے پر لوگوں نے انتظامیہ سمیت محکمہ تعمیرات عامہ کو تنقید کا نشانہ بنایا۔
ای ٹی وی بھارت کے ساتھ بات کرتے ہوئے مقامی باشندوں نے بتایا کہ سڑک کے بیچوں بیچ نصب بجلی کے کھمبوں کو کناروں پر نصب کرنے سے سڑک مزید وسیع ہو جاتی تاہم ایسا نہ کیے جانے کے سبب ’’سڑک کی میگڑمائزیشن عوامی پیسوں کا زیاں‘‘ ہے۔
مزید پڑھیں: بڈگام: پی ایم پیکیج کے تحت تمام سہولیت فراہم کرنے کا مطالبہ
لوگوں کا کہنا ہے کہ انہوں نے سڑک کی کشادگی کے لئے اپنی زمین وقف کی لیکن انتظامیہ کی جانب سے غفلت کا مظاہرہ کیے جانے کے سبب سڑک کی کشادگی اور میگڑمائزیشن کا اصل مقصد ہی فوت ہو رہا ہے۔
مقامی باشندوں نے اعلیٰ افسران سے علاقے کا از خود مشاہدہ کرنے کی اپیل کی تاکہ ترقیاتی کاموں پر خرچ کیے جا رہے کروڑوں روپے ضائع نہ ہوں اور عوام کو درپیش مشکلات کا بھی ازالہ ممکن ہو سکے۔
