پیپلز ڈیموکریٹک پارٹی (پی ڈی پی) کے جنرل سیکریٹری غلام نبی لون ہانجورا، ضلع صدر محمد یاسین بٹ کے علاوہ پارٹی کے دیگر لیڈران نے ضلع بڈگام کے چرار شریف میں واقع درگاہ حضرت شیخ نور الدین نورانیؒ کا دورہ کیا۔
دورے کے دوران پی ڈی پی لیڈران نے ہفتہ سے شروع ہونے والے عرس پاک کے حوالے سے کیے جارہے اقدامات کا جائزہ لیا۔
پی ڈی پی لیڈران نے ایل جی انتظامیہ سمیت ضلع انتظامیہ پر زور دیتے ہوئے کہا کہ عرس مبارک کے موقع پر زائرین کو سہولت پہنچانے کے لئے ہر طرح کے اقدامات اٹھائے جانے چاہئیں۔
انہوں نے کہا کہ ’’عرس پاک سے قبل روایتی طور جس طرح کے اقدامات کیے جاتے تھے ایسا کچھ دیکھنے کو نہیں مل رہا ہے۔‘‘ انہوں نے انتظامیہ سے عرس مبارک کے موقع پر زائرین کے لیے صاف پانی، بجلی، ٹرانسپورٹ سمیت پارکنگ کے انتظامات کے علاوہ زیارت شریف کی صاف صفائی کا پختہ انتظام کیے جانے کی بھی اپیل کی۔‘‘
دریں اثناء، غلام نبی لون نے پی اے جی ڈی کے موقف کے حوالے سے پوچھے گئے سوال کے جواب میں کہا کہ ’’پی اے جی ڈی کا موقف واضح ہے اور ہم لگاتار اسی موقف پر کام کرتے رہیں گے۔‘‘
