ریلوے پولیس کے مطابق کافی عرصے سے سرگرم ایک گروہ ریلوے سے لوہا چراکر اسے فروخت کررہے تھے، ریلوے پروٹیکشن فورس بڈگام نے اس سلسلے میں پانچ افراد کو گرفتار کرکے مسروقہ مال برآمد کرنے کا دعویٰ کیا ہے، وہیں ان کے مطابق اس سلسلے میں مزید گرفتاریاں بھی متوقع ہیں۔
ریلوے پولیس کے مطابق اکیس اکتوبر کو انہیں اس گروہ سے متعلق ایک خفیہ اطلاع موصول ہوئی جس کے بعد ریلوے پولیس اسٹیشن بڈگام کی ایک ٹیم نے کارروائی شروع کی اور دو افراد کو دھرلیا گیا۔
پولیس کے مطابق تفتیش کے دوران انہیں یہ معلوم ہوا کہ یہ افراد چوری کا سامان پارمپورہ، سرینگر میں کباڑی کو بیچ رہے تھے۔
ریلوے پولیس کے مطابق تفتیش کے دوران کئی افراد کے ملوث ہونے کے ثبوت و شواہد سامنے آئے ہیں، انہوں نے کہا کہ مزید تین افراد کو گرفتار کیا گیا ہے اور اس ضمن میں مزید گرفتاریاں متوقع ہیں۔
مزید پڑھیں: ضلع بڈگام کے درگنڈ علاقے میں بنیادی ضروریات کا فقدان
چوری کے الزام میں گرفتار کیے گئے پانچوں افراد فروٹ منڈی، پارمپورہ، سرینگر کے رہائشی ہیں اور قریب ایک ماہ سے وہ دن دہاڑے ریلوے کا لوہا چرارہے تھے۔ ان کی شناخت میر عادل، نعیم اشرف، گلو کباڈی، ارسلان اور سجاد احمد منڈو کے طور پر ہوئی ہے۔
ان کے خلاف ایف آئی آر نمبر 2/2021 سیکشن 3 آر پی (یوپی) ایکٹ( railway property unlawful act) کے تحت درج کرکے مزید تفتیش شروع کی گئی ہے۔
