بڈگام: کمیونٹی ہال کی تعمیر جلد مکمل کیے جانے پر زور

ضلع بڈگام کے خان صاحب علاقے میں ڈی ڈی سی ممبر نے ایک اجلاس کے دوران عوام کو بجلی، پانی اور سڑک جیسی بنیادی ضروریات پہنچانے کے علاوہ زیر تعمیر کمیونٹی ہال کی تعمیر کو بھی جلد از جلد مکمل کیے جانے پر زور دیا۔

وسطی کشمیر کے ضلع بڈگام کے خانصاحب علاقے میں پیر کو ڈی ڈی سی ممبر بشیر احمد بٹ نے ایک اجلاس کا انعقاد کیا۔ اجلاس کے دوران ڈی ڈی سی ممبر نے میٹنگ میں موجود سبھی افراد سے علاقے کی ترقی کے لئے مستعدی سے کام کرنے پر زور دیا۔

انہوں نے کہا کہ ’’علاقے کے لوگ ابھی بھی بجلی، پانی اور سڑک جیسی بنیادی سہولیات سے محروم ہیں۔‘‘ انہوں نے بی ڈی سی ممبران، پنچ سرپنچ صاحبان سے عوام کو درپیش مشکلات کا جلد ازالہ کرنے کی ہدایت کی۔

انہوں نے کہا کہ ضلع انتظامیہ نے سبھی ڈی ڈی سی ممبران کو اکہتر لاکھ روپے کا فنڈ واگزار کیا ہے، انکے مطابق فنڈ واگزار ہونے سے علاقے کے کئی مسائل کا ازالہ کیا جائے گا۔

میٹنگ میں خانصاحب بلاک کے کئی اہم اراکین کے ساتھ ساتھ بی ڈی او خانصاحب، بی ڈی سی ممبران کے علاوہ پنچ و سرپنچ صاحبان نے حصہ لیا۔

میٹنگ کے بعد انہوں نے بی ڈی او دفتر کے روبرو تعمیر کیے جا رہے کمیونٹی ہال کا بھی معائنہ کیا۔ معائنہ کے دوران انہوں نے متعلقہ افسران کو ہدایت دی کہ وہ کمیونٹی ہال کی تعمیر جلد مکمل کریں تاکہ کمیونٹی ہال کو جلد سے جلد عوام کے لیے وقف کیا جا سکے۔