قومی خواتین کمیشن کی رکن چندرمکھی نے کہا کہ وہ پولیس کی جانچ سے مطمئن نہیں ہیں۔ کئی پہلو ایسے ہیں جس کی تفتیش پولیس نے ابھی تک نہیں کی ہے۔
ای ٹی وی بھارت سے بات کرتے ہوئے کمیشن کی رکن چندرمکھی نے بتایا کہ پولیس نے اس گاڑی کی تحقیقات نہیں کی ہے جس سے بچی کو اغوا کیا گیا تھا۔
میڈیکل جانچ میں تاخیر کے ساتھ ابھی تک فورنسک جانچ کے لیے کپڑے نہیں بھیجے گئے ہیں۔ بچی پر بیان سے پلٹنے کے لیے دباو ڈالا جارہا ہے۔
انہوں نے کہا کہ بِہار میں خواتین کے ساتھ ظلم و زیادتی کی جارہی ہے۔ آبروریزی کے واقعات میں مسلسل اضافے ہورہے ہیں اور یہ واقعات اس لیے بڑھ رہے ہیں کیونکہ پولیس کی جانچ اور کاروائی متاثر کن نہیں ہے۔
ان کا مطالبہ ہے کہ فاسٹ ٹریک کورٹ چلاکر اگر قصورواروں کوسزا دی جائیگی تبھی اس طرح کے واقعات میں کمی ہوگی۔
چندرمکھی نے کہا کہ اس معاملے کی رپورٹ وزیراعلی نتیش کمار سمیت مرکزی حکومت کو کمیشن پیش کرے گا اور حکومت سے قصورواروں پر سخت کاروائی کے ساتھ تساہلی برتنے والے پولیس افسران پر بھی کاروائی کا مطالبہ کیا جائے گا۔
انہوں نے بہار میں بڑھتے مجرمانہ واقعات پر تشویش کا اظہار کیا اور پولیس کے جانچ پر سوال کھڑا کیا ہے۔
واضح رہے کہ ریاست بہار کے ضلع گیا کے موہن پور حلقہ میں گزشتہ 15 اگست کی شام کو ایک نابالغ طالبہ کے ساتھ چھ افراد نے جنسی زیادتی کی تھی۔
متاثرہ لڑکی 16 اگست کی صبح بیہوشی کی حالت میں پائی گئی تھی۔ واقعہ کے بعد گاوں کی پنچایت نے متاثرہ کو ہی قصوروار ٹھہرا کر اس کے بال کومنڈوادیا اور اسے پورے گاوں میں گھمایا تھا اور لڑکی کے والدین کو سزا کے طور پر دس دس لاٹھی ماری گئی تھی۔
واقعہ کے متعلق پولیس کو جانکاری نہیں دینے کو پنچایت نے ہدایت جاری کی تھی۔ 22 اگست کو لڑکی نے معاملے کی اطلاع ایس ایس پی کو دی تھی جس کے بعد یہ کیس سرخیوں میں آیا اور پولیس نے اس کے بعد کاروائی کی تھی۔
اس کیس میں اب تک آٹھ افراد کی گرفتار عمل میں آئی ہے۔
