پٹنہ کے ووٹرز کیا کہتے ہیں؟

ریاست بہار کے دارالحکومت پٹنہ پر اس بار پورے ملک کی نظر ہے۔ دلچسپ بات یہ ہے کہ پٹنہ صاحب پارلیمانی حلقے میں بی جے پی سے ناراض ہو کر کانگریس میں شامل ہوئے موجودہ رکن پارلیمان شتروگھن سنہا اور مرکزی وزیر قانون و بی جے پی کے امیدوار روی شنکر پرساد کے درمیان کانٹے کی ٹکر ہے۔

اس سلسلے میں ای ٹی وی بھارت کے نمائندے نے پٹنہ کے عوام سے ان کی رائے معلوم کرنے کی کوشش کی۔

عثمان غنی انسٹیٹیوٹ کے سکریٹری انعام خان نے کہا کہ 'وہ اپنے ووٹ کا استعمال سیکولر حکومت کے لیے کرنا چاہتے ہیں تاکہ ملک میں سیکولر حکومت کی تشکیل ہو سکے۔'

مکیش کمار کا کہنا ہے کہ 'سیاسی رہنما انتخاب کے وقت بہت سے وعدے کرتے ہیں اور ترقی کے نام پر دھوکہ دے کر چلے جاتے ہیں۔ ہم کئی برس سے ووٹ دے رہے ہیں اور ہم چاہتے ہیں کہ جو حکومت آئے وہ ترقی کرے اور روزگار کے مواقع مہیا کرائے۔'

پٹنہ میں پان کی دکان چلانے والے راجیش کمار کا کہنا ہے کہ 'وہ ووٹ ترقی اور ملک کی سلامتی کے لیے کریں گے لیکن وہ یہ بھی چاہتے ہیں کہ بیروزگاری کا مسئلہ حل ہو۔'

انہوں نے بتایا کہ 'وہ گریجویٹ ہیں، اس کے باوجود پان کی دکان چلا رہے ہیں۔'

روپ کماری جو ایک کمپیوٹر انسٹیٹیوٹ میں استاد کی حیثیت سے کام کرتی ہیں، انہوں نے کہا کہ 'ہم ایسی حکومت چاہتے ہیں جو غربت، بے روزگاری جیسے مسئلے کو حل کریں۔'