ایس ایس پی راجیو مشرا نے بتایا کہ مقتول ویریندر پاسوان کے بڑے بیٹے سوربھ نے سازش کے تحت اپنے والد ویریندر پاسوان کا قتل کرایا تھا۔ فی الحال پولیس نے بڑے بیٹے سوربھ کمار ، شوٹر لالو یادو ، اروند کمار اور سم فروخت کرنے والی خاتون رادھا دیوی کو گرفتار کرلیا ہے۔
ایس ایس پی راجیو مشرا نے معاملے کی وضاحت کرتے ہوئے بتایا کہ متوفی ویریندر پاسوان نے گزشتہ دنوں اپنے کنبے کی ملکیت بڑے بیٹے سوربھ کے نام کر دیا تھا ۔ یہاں تک کے اپنا بینک پاس بک اور اے ٹی ایم بھی بڑے بیٹے کے پاس رکھے ہوئے تھے۔ شروع میں سوربھ صحیح طریقے سے کنبہ چلا رہا تھا ، لیکن پچھلے سال سے اس نے اپنے والد کی رقم ذاتی دولت بڑھانے کے لئے استعمال کرنا شروع کردیا اور اہل خانہ کو پیسے دینے بند کردیئے تھے۔
بڑے بیٹے کی اس رویہ سے گزشتہ ماہ دونوں میں تنازعہ ہوا جس کے بعد وریندر پاسوان نے بڑے بیٹے سے اے ٹی ایم لے کر چھوٹے بیٹے کے حوالے کردیا۔ اس کے بعد وی آر ایس لینے کے بعد چھوٹے بیٹے روپ کمار کو چوکیداری دینے کا فیصلہ کیا تھا ۔ والد کے اس فیصلے کی وجہ سے بڑا بیٹا سوربھ ناراض ہوگیا اور چوکیداری کے لالچ میں اس نے اپنے باپ کو راستے سے ہٹانے کے لئے ڈیڑھ لاکھ روپئے خرچ کر کے شوٹر کے ذریعے قتل کروا دیا ۔
ایس ایس پی نے بتایا کہ اپنے والد کے فیصلے سے پریشان سوربھ نے اپنے دوست اروند سے اپنے والد کو راستے سے ہٹانے کے بارے میں تبادلہ خیال کیا تھا۔ جس کے بعد اروند نے اسے شوٹر لالو یادو سے ملوایا اور قتل کرنے کی رقم 1.5 لاکھ فائنل ہوئی ۔ اس میں کچھ رقم ایڈوانس کے طور پر بھی دی گئی تھی۔
واضح ہوکہ سات جون کی رات 9 بجے چوکیدار مخدم پور قرنطینہ سینٹر پر ڈیوٹی کر رہا تھا تبھی بدمعاشوں نے گولی مار کر قتل کردیا تھا۔
