ریاست بہار میں ضلع کیمور کے بھگوان پور تھانہ علاقہ کے ہری پور گاؤں میں مناسب علاج نہیں ہونے کے سبب آج دو بچے کی موت ہو گئی جبکہ والدہ کی حالت تشویشناک بنی ہوئی ہے، انہیں ضلع کے صدر ہسپتال میں داخل کرایا گیا ہے۔
مقامی لوگوں کے مطابق بھاٶتی دیوی کے بچے جب بیمار پڑے تو لواحقین کے زریعہ مقامی ڈاکٹر سے ان کا علاج کرایا گیا۔ لیکن بچے کی صحت میں کوئی تبدیلی نہیں آئی اور نیرج کی موت ہو گئی۔ جبکہ بہن چاندنی کی موت بھی کچھ اسی طرح سے ہوئی ۔
اس معاملے کی اطلاع پر منگل کو بھگوان پور محکمہ صحت کی ٹیم ہری پور گاؤں پہنچی تو مقامی لوگوں نے بتایا کہ ایک ہی گھر سے بیٹا اور بیٹی دونوں کی موت ہوگئی ہے اور ماں شدید بیمار ہے۔ محکمہ صحت نے جب گاؤں کی صورتحال کا جائزہ لیا۔ تو مذکورہ خاندان کے علاوہ تمام فرد صحتیاب پائے گئے۔
اس تعلق سے ڈاکٹر سنتوش کمار نے بتایا کہ مقامی لوگوں کے مطابق بیٹے اور بیٹی کی طبیعت خراب ہونے کے بعد اہل خانہ نے دونوں بچوں کو گاؤں کے ڈاکٹر کے پاس علاج کرایا تھا ، جس کے بعد نیرج کا اتوار کو اور چاندنی کا پیر کو انتقال ہوگیا۔ اس کے بعد دونوں کی والدہ کی طبیعت بھی بگڑ گئی۔ جسے ایمبولینس کے ذریعے صدر اسپتال روانہ کیا گیا ہے، مقامی لوگوں کا کہنا ہے کہ دونوں کا مناسب علاج نہ ہونے کی وجہ سے موت واقع ہو گئی ۔
