ریاست بہار کے ضلع گیا کے بودھ گیا تھانہ میں ہولی دہن پر آگ میں جھلسنے سے تین بچوں کی موقع پر ہی موت ہوگئی ہے۔
حادثہ پہاڑی پر پیش آیا ہے اور اس میں ایک اور بچہ شدید زخمی ہوگیا ہے جسے علاج کے لیے انوگرہ نارائن ہسپتال میں بھرتی کرایا گیا ہے۔
بودھ گیا تھانہ حدود میں واقع ڈونگیشوری کے دلت ٹولہ راہل نگر میں رنگوں کے تہوار ہولی سے قبل رات میں خوشیوں کا ماحول غمگین ہوگیا ہے کیوں کہ آگ میں جھلسنے سے تین بچوں کی موت ہوگئی ہے جبکہ ایک بچہ شدید طور پر زخمی ہوگیا۔
اطلاع کے مطابق گزشتہ رات 'ہولیکا دہن' کے بعد بچے لکواری لیکر پاس میں واقع پہاڑی پر پھینکنے چلے گئے، بچے آگ کی لکواری لیکر پہاڑی پر کافی دور چلے گئے۔
اسی دوران کسی اور بچہ نے پہاڑی پر ایک بڑی جھاڑی میں آگ کی لکواری کو پھینک دیا جس سے پہاڑی پر آگ کے شعلے بھڑک اٹھے اور بچے اس آگ کی زد میں آکر ہلاک ہوگئے۔
اس واقعہ سے تہوار کی خوشی غم میں بدل گئی ہے، آگ لگنے کی اطلاع پر مقامی لوگوں نے پہاڑی پر پہنچ کر سب سے پہلے بچوں کو نکالنے کی کوشش کی، تاہم آگ پر قابو پالیا گیا ہے۔
واضح رہے کہ ہلاک ہونے والے تینوں بچے ایک ہی کنبہ کے ہیں، ان تینوں میں کلیشور مانجھی کا 12 برس کا بیٹا روہت کمار، ببلو مانجھی کا 13 برس کا بیٹا نندلال مانجھی اور پنٹو مانجھی کا 12 برس کا بیٹااوپیندر کمار شامل ہیں۔
وہیں موراٹال پنچایت کی نائب مکھیا گیتا دیوی کے 12 برس کے بیٹے ریتیش کمار کو زخمی حالت میں ہسپتال میں بھرتی کرایا گیا ہے جہاں پر اس کا علاج جاری ہے تاہ، ضلع انتظامیہ کی ٹیم نے پہنچ کر واقعہ کا جائزہ لیا ہے۔
