ریاست بہار کے شہر گیا کے گاندھی میدان کے پاس واقع رین بسیرا میں مزدور اور بے سہارا افراد کو رات گزارنے کے لیے سرکاری انتظامات کیے گئے ہیں۔ پہلے 25 روپے فیس لی جاتی تھی تاہم اب مفت میں رات گزارنے کا انتظام ہے۔ لیکن یہاں شراب پی کر رات گزارنے میں کوئی پابندی نہیں ہے۔ کیونکہ یہاں اکثر نشے کی حالت میں رات گزارتے لوگ نظر آجاتے ہیں، حالانکہ پکڑے جانے پر رین بسیرا کی دیکھ ریکھ کرنے والوں کا دعویٰ ہے کہ ایسا پہلی مرتبہ ہوا ہے۔
ای ٹی وی بھارت کی ٹیم رین بسیرا کے انتظام و انصرام کے متعلق جاننے کے لیے جب وہاں پہنچی تو وہاں ایک شرابی سے ملاقات ہوگئی۔
گاندھی میدان کے پاس واقع رین بسیرا کے کیئرٹیکر اور مینیجر دونوں ہی وہاں پر موجود نہیں تھے، بیڈ پر لیٹا امیش کمار نامی ایک شخص نشے کی حالت میں نظر آیا۔ پوچھے جانے پر بتایا کہ وہ یہاں پر کئی دنوں سے رات گزار رہا ہے۔
پیشے سے خود کو مزدور بتانے والا امیش کمار نے اعتراف کیا کہ اس نے شراب پی رکھی ہے۔ اس نے شراب پینے کا الگ ہی دعویٰ کیا اور کہا کہ وہ مزدور ہے اور شراب پینا اس کی مجبوری ہے۔
یہ بھی پڑھیں: گیا میں چار دنوں میں کورونا کے 53 نئے مریض
ایک سوال کے جواب میں اس نے کہا کہ یہاں نشے کی حالت میں آنا منع ہے لیکن وہ ایسا کام کرتا ہے کہ شراب پینا اس کی مجبوری ہے۔
رین بسیرا کے کیئرٹیکر امیش سنگھ نے بھی تسلیم کیا کہ ایک شخص شراب کے نشے میں یہاں رہ رہا ہے۔ پوچھے جانے پر کہا کہ شراب پی کرکے ایک شخص یہاں پر ٹھہرا ہوا ہے۔ اس کی اطلاع دینے کے لیے وہ مینیجر کے پاس گئے ہوئے تھے۔ حالانکہ کیئرٹیکر نے کہا کہ پہلی مرتبہ ایسا ہوا کہ کوئی شخص شراب کے نشے میں یہاں آیا ہے۔
