ریاست بہار کی طرح بھاگلپور کے سکولز میں بھی تقریباً نو مہینے بعد پڑھائی شروع ہوگئی ہے۔ یہ مسلم اردو گرلز ہائی سکول کی درس گاہ کا نظارہ ہے جہاں سکول کھلنے کے پہلے ہی دن بڑی تعداد میں طالبات درسگاہ پہنچی اور کلاس شروع کی۔
لاک ڈاؤن کے باعث طلبا و طالبات کی پڑھائی کا بے حد نقصان ہواہے اس لیے طالبات خوش ہیں کہ سکول کھلنے سے ان کی تعلیم کے دور کا دوبارہ آغاز ہوگیا ہے۔
کلاس روم میں طلبہ و طالبات سماجی دوری کا خیال رکھتے ہوئے اور ماسک لگا کر پڑھائی کرتے نظر آئے۔
چونکہ مارچ کے بعد سے کلاسز نہیں ہوئی ہیں تو نصاب جلد مکمل کرانا اساتذہ کی ایک بڑی ذمہ داری ہے۔
مسلم اردو گرلز ہائی سکول کی نائب پرنسپل ریشمہ نگار نے بتایا کہ سماجی دوری کا پاس رکھتے ہوئے کلاس میں طالبات بیٹھ رہی ہیں ساتھ ہی سبھی بچوں کو ماسک دیا گیا ہے۔
آپ کو بتا دیں کہ ریاست بہار میں چار جنوری سے 9ویں سے 12ویں جماعت کے لیے سکول کھل گئے ہیں حالانکہ چھوٹی جماعتوں کے لیے اسکول کھولنے کا فیصلہ حکومت نے ابھی تک نہیں لیا ہے۔
امید کی جا رہی ہے کہ حالات کو پیش نظر رکھتے ہوئے حکومت اس پر بھی جلد کوئی فیصلہ کرے گی۔
بہرحال بڑی جماعتوں کے لیے ہی صحیح سکول کھلنے سے تعلیمی اداروں میں مہینوں سے چھائی ویرانی دور ہوئی ہے۔
