آر جے ڈی لیڈر میر رزاق سڑک حادثے میں شدید زخمی

میر رزاق جوکی ہاٹ سے عظیم اتحاد کے امیدوار سرفراز عالم کے انتخابی جلسے سے خطاب کرنے کے بعد تنہا موٹر سائیکل سے ارریہ کی جانب آ رہے تھے۔ اس دوران ان کے ساتھ یہ حادثہ پیش آیا ہے۔

راشٹریہ جنتا دل کے ریاستی جنرل سکریٹری میر رزاق آج دیر شب سڑک حادثہ میں شدید طور سے زخمی ہو گئے، جہاں مقامی لوگوں کی مدد سے انہیں ارریہ صدر ہسپتال پہنچایا گیا مگر نازک حالت دیکھتے ہوئے ڈاکٹر نے انہیں فوری طور سے پورنیہ میکس ہسپتال ریفر کر دیا۔

صدر اسپتال میں ڈاکٹروں کی ایک ٹیم نے انہیں آئی سی یو میں داخل کیا ہے، زخمی میر رزاق کے جسم سے زیادہ خون نکلنے کی وجہ سے وہ مکمل بے ہوش ہیں، خبر عام ہوتے ہی شہر کے لوگ بڑی تعداد میں ہسپتال پہنچے.

مذکورہ واقعہ دیر شب ارریہ کے بیر گاچھی چوک واقع مینا پور کے پاس کا ہے، میر رزاق جوکی ہاٹ سے عظیم اتحاد کے امیدوار سرفراز عالم کے انتخابی جلسے سے خطاب کرنے کے بعد تنہا موٹر سائیکل سے ارریہ کی جانب آ رہے تھے. تبھی مینا پور کے پاس سامنے اچانک سے ایک شخص آتا دکھائی پڑا جسے بچانے کے سلسلے میں میر رزاق کی موٹرسائیکل کا توازن بگڑ گیا اور وہ موٹرسائیکل سمیت سڑک کے نیچے گڈھے میں جا گرے۔

جس کی وجہ سے زخمی میر رزاق کا سر پھٹ گیا ہے، علاوہ ازیں کان اور ناک سے خون کا بہاؤ لگاتار جاری تھا. موٹرسائیکل گرنے کی آواز سن کر وہاں موجود مقامی لوگ دوڑ پڑے اور اسے اٹھا کر فوراً ارریہ صدر ہسپتال داخل کیا.

واضح رہے کہ بیر گاچھی چوک کے پاس مینا پور موڑ پر آئے دن حادثہ پیش آتے ہیں، باوجود اس کے ضلع انتظامیہ کی اس پر کوئی توجہ نہیں ہے. مقامی لوگوں نے کئی بار یہاں پر بیرکیٹس لگانے کی درخواست کی لیکن انتظامیہ خاموش تماشائی بنی ہوئی ہے۔