بہار کے ضلع ارریہ میں واقع المنار ایجوکئیر اسکول ایک ایسا اسکول ہے جہاں بچوں کو عصری تعلیم کے ساتھ بنیادی دینی تعلیم سے بھی روشناس کیا جاتا ہے۔ ایسے میں آج اسکول کے احاطے میں طلباء کے درمیان مسابقۃ القرآن کا پرشکوہ پروگرام منعقد کیا گیا جس میں شہر کے معززین نے شرکت کی۔
مسابقۃ القرآن میں مولانا ڈاکٹر قمر فلاحی، مولانا شوکت علی قاسمی اور قاری اطہر قاسمی بحیثیت جج رہے۔
اس پروگرام میں طلبا و طالبات نے بہترین انداز میں قرآن کریم کی تلاوت کی۔ طلبا و طالبات نے تجوید کے مطابق مخارج کی ادائیگی کی اور بہترین لب و لہجے میں کلام الہی کی تلاوت کی جس سے تمام شرکأ محظوظ ہوئے۔
علاوہ ازیں جج حضرات طلباء سے بطور امتحان قرآن شریف کی مختلف آیات کی تلاوت کرائی اور بچوں نے بھی اپنی بہترین ذہانت کا ثبوت پیش کرتے ہوئے ان آیات کی تلاوت کی۔
پروگرام کے آخر میں کامیاب طلبا و طالبات کو اسکول کے چیئرمین ماسٹر محمد محسن کے ہاتھوں انعامات و اعزازات سے بھی نوازا گیا۔
اس موقع پر مہمان خصوصی جامع مسجد ارریہ کے امام و خطیب مفتی آفتاب عالم مظاہری نے کہا کہ المنار ایجوکئیر کی یہ بہترین اور قابل تحسین کوشش ہے جہاں طلباء کو اس نہج سے تعلیم دی جا رہی ہے، مجھے جیسی امید تھی بچوں نے ویسا ہی پروگرام پیش کیا اور بچوں کے قرآن کی تلاوت سے دل مسحور ہوا۔
دارالعلوم رحمانی کے شیخ الحدیث مفتی علیم الدین نے کہا کہ آج کے دور میں اس طرح کے پروگرام اسکولوں میں ہونا بہت ضروری ہے، اب ہمارے درمیان ایسے پروگرام ہونے کے بجائے فحش پروگرام منعقد ہوتے ہیں جس سے بچوں پر غلط اثرات پڑتے ہیں۔
المنار ایجوکئیر کے ڈائریکٹر عفان کامل نے بتایا کہ ہمارے یہاں یہ پروگرام ہر سال منعقد کیا جاتا ہے اور ایسے پروگرام کرنے کا مقصد بچوں میں قرآن کے تعلق سے بیداری اور دلچسپی پیدا کرنا ہے اور یہ بتانا ہے کہ قرآن ہی سرمایہ حیات ہے۔ اس سے غفلت نہیں برتی جا سکتی۔
