بھاگلپور میں کورونا ٹیکہ کاری کی تیاریاں مکمل

پورے ملک کی طرح ریاست بہار کے بھاگلپور میں بھی سنیچر کے روز سے کورونا کی ٹیکہ کاری کا آغاز ہو رہا ہے۔ اس سلسلے میں بھاگلپور کے ضلع مجسٹریٹ سبرت کمار سین نے افسران کے ساتھ ایک اہم میٹنگ کی اور ٹیکہ کاری کی تیاریوں کا جائزہ لیا۔

ضلع مجسٹریٹ نے اس کی اطلاع دیتے ہوئے بتایا کہ پہلے مرحلہ میں صحت شعبے سے جڑے عملے کو ٹیکہ لگایا جائے گا۔

ضلع حکام کے مطابق بھاگلپور ضلع میں کورونا کی ٹیکہ کاری کے لئے 10 مراکز بنائے گئے ہیں اور پہلے فی سائٹ 100 لوگوں کو ٹیکہ کاری کا ہدف طے کیا گیا ہے۔

ٹیکہ لینے کے لئے ہر ایک کا رجسٹریشن لازمی ہوگا اور کورونا کی ٹیکہ کاری لازمی ہوگی، اس کے بعد ہی کورونا سے محفوظ تصور کیا جائے گا۔

ٹیکہ لگوانے والے لوگوں کو کچھ دیر تک مشاہدہ کیا جائےگا اور اس کے لئے ٹیکہ کاری کے مراکز پر مناسب انتظام کیے گئے ہیں تاکہ کسی ناگہانی صورتحال سے نپٹا جاسکے۔

ضلع مجسٹریٹ نے یقین دلایا کہ ٹیکہ کاری کے لئے تیاریاں پوری کر لی گئی ہیں۔ انہوں نے عوام کو یقین دلایا کہ یہ ٹیکہ پوری طرح سے محفوظ ہے لہذا کسی کو گھبرانے کی ضرورت نہیں ہے۔