ہندوستانی عوام مورچہ کے ترجمان دانش رضوان نے بی جے پی کی مجوزہ نئی آبادی پالیسی کی سخت مخالفت کی ہے۔
این ڈی اے کی جانب سے یہ تکرار وزیراعلیٰ نتیش کمار کے بیان کے بعد سامنے آنے لگی ہے۔ نتیش کمار نے اپنے بیان میں کہا تھا کہ اس قانون کی ضرورت نہیں ہے۔
دانش رضوان نے کہا کہ آبادی کنٹرول پر صرف سیاست سے کچھ نہیں ہوگا۔
عورتوں میں تعلیمی بیداری سے ہی اس کا حل نکلے گا۔ انہوں نے کہا کہ یہ نیا شگوفہ مہنگائی سے لوگوں کی توجہ ہٹانے کے لیے ہے۔
انہوں نے کہا کہ ہمارے لیڈر جیتن رام مانجھی اور وزیراعلیٰ نتیش کمار نے واضح طور پر کہا ہے کہ آبادی کو قابو میں رکھنے کے لیے کسی قانون کی ضرورت نہیں ہے۔ اس کو کنٹرول کرنے کے لیے مضبوط قوت ارادی کی ضرورت ہے۔
وزیراعلیٰ نتیش کمار نے یہ کر کے دکھا یا ہے۔ بہار میں عورتوں کی تعلیمی شرح میں اضافہ ہونے کے بعد آبادی کی شرح میں نمایاں کمی آئی ہے۔
وزیراعلیٰ نتیش کمار نے عورتوں کے لیے مفت تعلیم کا نظم کیا۔ لڑکیوں کو سائیکل دیا اس سے ان میں تعلیم کے لیے ماحول پیدا ہوا۔
آبادی کو قابو میں رکھنے کے لیے قانون کی نہیں عورتوں کو تعلیم یافتہ بنانے کی ضرورت ہے جیسا وزیراعلیٰ نتیش کمار نے کیا۔ ان کے ماڈل کو تمام دوسری ریاستوں کو بھی اپنانا چاہیے۔
