کثیر مقدار میں شراب ضبط، 35 گرفتار

ریاست بہار کے ضلع سپول میں شراب کی غیر قانونی اسمگلنگ کے خلاف چلائی گئی خصوصی مہم میں پولیس نے کثیر مقدار میں دیسی، انگریز ی شراب ضبط کرکے 35 افراد کو گرفتار کیا ہے۔

پولیس سپرنٹنڈنٹ منوج کمار نے آج یہاں بتایا کہ خصوصی مہم کے تحت ضلع کے 98 مشتبہ ٹھکانوں پر چھاپے ماری کی گئی۔ انہوں نے بتایا کہ چھاپے ماری کے دوران 2647.5 لیٹر انگریزی شراب جبکہ 1253 لیٹر دیسی شراب ضبط کی گئی۔

کمار نے بتایاکہ شراب رکھنے یا اسمگلنگ کرنے کے الزام میں 25 جبکہ شراب پینے کے الزام میں دس لوگوں کو گرفتار کیا گیا ہے۔

انہوں نے بتایاکہ منشیات امتناع ایکٹ سے متعلق کل 25 معاملے مختلف تھانوںمیں درج کیے گئے ہیں۔ چھاپے ماری کے دوران ایک ٹرک، دو کار اور دو موٹر سائیکل بھی ضبط کی گئی ہے۔