بہار انتخابات کے تیسرے اور آخری مرحلے کے تحت 7 نومبر کو ووٹ ڈالے جائیں گے۔ ووٹنگ کے ایک روز قبل وزیراعظم نریندر مودی نے بہار کے عوام کے نام ایک کھلا خط تحریر کیا ہے۔
اپنے خط میں مودی نے بہار میں این ڈی اے حکومت بننے کا یقین ظاہر کرتے ہوئے لکھا کہ این ڈی اے حکومت میں ہی بہار ترقی کرسکتا ہے۔
وزیراعظم نے اس بات پر فخر کا اظہار کہ بہار انتخابات میں ترقی کے موضوع پر توجہ دی جارہی ہے۔ انہوں نے لکھا کہ این ڈی اے نے بہار کے عوام کے سامنے اپنا رپورٹ کارڈ پیش کیا اور مستقبل کےلیے اپنا وژن بھی بتایا ہے۔ انہوں نے بہار کے تمام شعبوں میں کام کرنے کا بھی دعویٰ کیا۔
4 صفحات پر مشتمل عوام کےلیے کھلے خط میں مودی نے کہا کہ بنیادی ڈھانچے میں بہتری اور قانون کی حکمرانی سے ہی ریاست میں معاشرتی اور معاشی ترقی کی جاسکتی ہے جبکہ یہ صرف این ڈی اے حکومت میں ہی ممکن ہے۔
مودی نے اس توقع کا اظہار کیا کہ ’مجھے پورا یقین ہے کہ ’ڈبل انجن‘ کی طاقت اس بار بہار کو ترقی کی نئی بلندیوں پر پہنچائے گی‘۔ انہوں نے مزید کہا کہ ’بہار میں ہمیں نتیش کمار حکومت کی ضرورت ہے تاکہ مرکزی کی اسکیمات کو بلاتعلطل یہاں جاری رکھا جائے۔
بہار اسمبلی انتخابات کے تیسرے مرحلہ کے تحت 78 سیٹوں پر 7 نومبر کو ووٹنگ ہوگی جبکہ نتائج کا اعلان 10 نومبر کو کیا جائے گا۔
