پٹنہ: غلام سرور فاﺅنڈیشن کے تحت سالانہ جلسہ تقریب کے موقع پر سالار اردو الحاج غلام سرور کی زندگی اور بہار کی تعمیر و ترقی ان کی نمایاں خدمات کو یاد کرنے کیلئے 5 فروری 2023 بروز اتوار صبح 10 بجے سے دن کے 2 بجے دن کے درمیان ایک خصوصی تقریب کا انعقاد کیا جا رہا ہے۔ امرپالی ریزیڈنسی قدوائی پوری میں منعقد ایک پریس کانفرنس سے خطاب کرتے ہوئے غلام سرور فاﺅنڈیشن کے سکریٹری محمد شوکت علی، محمد سیف اور افتخار احمد نے مشترکہ طور پر اس کی اطلاع دی۔
شوکت علی نے بتایا کہ تقریب میں سیاسی و سماجی حلقوں سے کئی اہم شخصیات نے اپنی آمد کی منظوری دے دی ہے۔ غلام سرور نے بہار میں اردو زبان کو دوسری سرکاری زبان بنانے میں جو اہم کردار ادا کیا ہے۔ اسے کبھی فراموش نہیں کیا جائے گا.مظلوموں کی آواز بن کر ہمیشہ حکومت وقت سے ٹکراتے رہے، غلام سرور کے جانے کے بعد آج بھی یہ خلاء نہیں بھر سکا۔
انہوں نے کہا کہ غلام سرور فاﺅنڈیشن گزشتہ کئی برسوں سے سماج کے ہر طبقہ کو اوپر اٹھانے کیلئے جدوجہد کر رہی ہے ۔ ریاست کے کئی اضلاع میں مقابلہ جاتی امتحانات کیلئے کوچنگ اور اسکالرشب کا بھی نظم کر رہی ہے ۔ اس کے علاوہ بچے اور بچیوں کی تعلیم کیلئے بھی نمایاں کام کررہی ہے. غلام سرور جیسی قدآور شخصیت کے نام پر اس فاﺅنڈیشن کے قیام کا مقصد یہ ہے کہ انہوں (سرور) نے غریبوں اور خط افلاس سے نیچے کی زندگی گزارنے والوں کو پہلے صف میں کھڑا کرنے کا جو خواب دیکھا تھا۔ اسے شرمندہ تعبیر کیا جا سکے. فاﺅنڈیشن مسلسل اس جانب کوشاں ہے۔
