ریاست بہار کے ضلع گیا میں صبح سات بجے سے پنچایت انتخابات کے تحت چھٹے مرحلے کی ووٹنگ جاری ہے۔ تاہم اس دوران کئی بوتھس پر انتظامات ندارد ہیں۔
شیرگھاٹی بلاک میں واقع دریا پور پنچایت کے کھنڈیل گاؤں میں پِنک بوتھ پر بھی انتظامات کے نام پر خانہ پرتی ہے۔ کھنڈیل گاؤں کا بوتھ نمبر 9 اور 11 کو پنک بوتھ بنایا گیا ہے یہاں پر پریزائڈنگ افسر سے لےکر ووٹنگ کرانے کے لیے بھی خاتون اسٹاف کو تعینات کیا گیا ہے۔
بوتھ نمبر 9 پر کُل ووٹ 566 ہیں جبکہ بوتھ نمبر 11 پر ووٹرز کی تعداد 678 ہے۔ پنک بوتھ پر خاتون ووٹر کی تعداد زیادہ ہوتی ہے۔ پنک بوتھ کا مقصد معاشرے کو خواتین کی تعداد کا احساس کرانا ہوتا ہے یہی وجہ ہے کہ یہاں سارا نظام خواتین کے ہاتھوں میں ہوتا ہے۔ پنک بوتھ پر خواتین کے بیٹھنے کے لیے بھی الگ سے انتظامات ہوتے ہیں لیکن یہاں گھنٹوں خواتین کھڑی ہوکر اپنے نمبر کا انتظار کرتی رہیں۔
بوتھ پر تعینات پریزائڈنگ افسر بے بی کماری نے کہا کہ 'انہیں بتایا گیا تھا کہ یہ پنک بوتھ ہے تاہم یہاں کوئی انتظامات نہیں پایا۔ ای وی ایم مشین ہال میں روشنی کا بھی انتظام نہیں تھا بعد میں اسکا انتظام کیا گیا ہے۔
قطار میں کھڑی خواتین کا کہنا تھا کہ 'انتظامات ہوتے تو ووٹنگ کا عمل سست روی کا شکار نہیں ہوتا۔
یہ بھی پڑھیں: گیا: ضلع پریشد کے امیدوار قمر خان کے حامیوں نے انتخابی ریلی نکالی
واضح رہے کہ کھنڈیل مسلم اکثریت والا گاؤں ہے حالانکہ یہ جس پنچایت کے ماتحت ہے وہاں مکھیا اور ضلع پریشد کا عہدہ شیڈول کاسٹ خاتون کے لیے ریزرو ہے لیکن گاؤں دیہات کی سیاست کی وجہ سے بڑی برادریوں کے لوگ اپنی پسند کے امیدوار کو انتخابی میدان میں اتارے ہوئے ہیں جس کی وجہ سے ہر بوتھ پر ووٹرز کی لمبی قطاریں لگی ہوئی ہیں۔
