سات عزائم منصوبہ کے تحت ارریہ پہنچے بہار کے وزیر اعلیٰ نتیش کمار نے آج ارریہ کالج کے اسٹیڈیم میں اجلاس عام سے خطاب کرتے ہوئے کہا کہ یہ زمین ادب والوں کی ہے، جنہیں ہم نے بچپن سے دیکھا، جن کے فکر و نظر سے متاثر ہوا اور میری خوش قسمتی کہ ان سے کئی بار ملاقاتیں بھی ہوئی۔
آج ہمیں یہ بتاتے ہوئے خوشی ہو رہی ہے کہ ہم نے فیصلہ لیا ہے رینو جی کی زمین پر ایک انجنئیرنگ کالج کا وجود عمل میں آئے گا جس کا نام فنیشور ناتھ رینو انجنئیرنگ کالج ہوگا۔
علاوہ ازیں وزیر اعلیٰ نے ارریہ کالج میں پوسٹ گریجویشن کی تعلیم کو بھی ہری جھنڈی دکھاتے ہوئے کہا کہ آنے والے نئے سیشن میں ارریہ کالج میں پی جی کی بھی پڑھائی ہوگی۔ اب یہاں کے طلباء کو باہر جانے کی کوئی ضرورت نہیں ہے۔ ساتھ ہی نتیش کمار نے ضلع میں 727.93 کروڑ کے منصوبوں کا سنگ بنیاد رکھتے ہوئے کہا کہ آج ضرورت ہے لوگوں میں جل جیون ہریالی کے تحت بیداری لائی جائے۔ اسی کے تحت 19 جنوری کو بہار کے تمام اضلاع میں انسانی زنجیر منعقد کیا جائے گا آپ لوگ بھی اس مہم میں شریک ہو کر ایک تاریخ رقم کریں۔
رکن پارلیمان پردیپ کمار سنگھ نے کہا کہ وزیر اعلیٰ نتیش کا ہم ضلع کے تمام باشندوں کی جانب سے ان کا خیر مقدم کرتے ہیں اور ان کا شکریہ ادا کرتے ہیں کہ انہوں نے ارریہ کے لیے کئی اہم سوغات پیش کی، جس کی اس ضلع کو برسوں سے انتظار تھا۔
سب سے اہم چیز رینو جی کے نام سے منسوب انجنئیرنگ کالج کا قائم ہونا اپنے آپ میں ارریہ والوں کے لیے فخر کی بات ہے۔
اس سے قبل نتیش کمار نے شمع روشن کر اجلاس کا افتتاح کیا۔ فاربس گنج کے رکن اسمبلی منچن کیسری و رکن پارلیمان پردیپ کمار سنگھ نے شال پہنا کر وزیر اعلیٰ کا استقبال کیا۔ اس موقع پر وزیر اعلیٰ کو سننے بڑی تعداد میں لوگ موجود تھے۔
