بہار میں ماونوازوں نے تین گاڑیوں کو نذر آتش کردیا

بہار میں نکسل متاثرہ ضلع گیا کے آمس تھانہ علاقہ کے باگھ مروا گاوں کے نزدیک ممنوعہ نکسلی تنظیم سی پی آئی (ماونواز) کے انتہاپسندوں نے سڑک تعمیر کرنے والی ایک نجی کمپنی کی تین گاڑیوں کو نذر آتش کردیا۔

پولیس ذرائع کے مطابق ریگانیا گاوں سے باگھ مروا گاوں تک سڑک کی تعمیر کی جارہی تھی۔ کل دیر رات مذکورہ ممنوعہ تنظیم کے بارہ انتہاپسندوں نے باگھ مروا گاوں کے نزدیک حملہ کردیا اور دو ٹریکٹر اور ایک رولر کو آگ لگادی۔

ذرائع نے بتایا کہ واقعہ کی اطلاع ملنے پر پولیس کے اعلی افسران جائے واردات پر پہنچ کر تفتیش کررہے ہیں۔ اس سلسلے میں متعلقہ تھانہ میں معاملہ درج کرلیا گیا ہے اور ماونوازوں کی گرفتاری کے لیے چھاپہ مار کارروائی کررہی ہے۔