شہر کے دانشوران و مذہبی علمأ کرام نے عوام سے اپیل کی ہے کہ وہ آج کے دن یعنی شب برات کی عبادت اپنے اپنے گھروں کے اندر رہ کر کریں تاکہ جس وبا سے پوری دنیا پریشان حال ہے اس سے نجات مل سکے۔
مدرسہ اسلامیہ یتیم خانہ کے پرنسپل انچارج مولانا شاہد عادل قاسمی نے کہا کہ ملک ایک عالمی وبا کورونا وائرس سے بچاؤ کے لیے ہر ممکن کوشش کر رہا ہے چونکہ اس متعدی مرض سے بچنے کی سب سے اہم تدابیر اس کے چین کو توڑنا ہے اور اس چین کو توڑنے کے لیے بند کمرے ہی میں رہنا سب سے اہم ہے، لاک ڈاؤن نام ہی اپنے آپ کو کورنٹائین کر لینے کا ہے اور اسلام میں بھی جان بچانے کی ہدایت موجود ہے۔
جمعیۃ علما ہند ارریہ کے جنرل سکریٹری مفتی اطہر القاسمی نے کہا کہ کورونا وائرس کی عالمی تباہی کے مدنظر امت مسلمہ آج کے قبرستان جانے سے مکمل پرہیز کریں نیز دیگر جگہوں میں اجتماعی پروگرام منعقد کیے جاتے ہیں اسے بھی مکمل طریقہ سے بند کریں، حکومت ہند نے اس وبا سے لڑنے کی جو تدابیر اختیار کی ہیں اس پر ہم سبھی عمل پیرا ہونے کی ضرورت ہے۔
مولانا مصور عالم ندوی نے کہا کہ مہلک وبا کورونا کے پیش نظر حالات حاضرہ میں لوگ اپنے گھروں میں ہی عبادت کریں، حکومت کی جانب سے اٹھائے گئے اس قدم کو سنجیدگی سے لیتے ہوئے اس پر ہم سبھی کو عمل کرنا چاہیے۔
نوجوان سماجی کارکن عفان احمد نے کہا کہ اس وقت یہ حکم یا ہدایت ہر اعتبار سے عین دین ہے، احسن قدم ہے اور ہم سب کو اس کا استقبال کرنا چاہیے.
ان کے علاوہ الحاج محمد محسن، ڈاکٹر عابد حسین، مفتی انعام الباری، سید شمیم انور، مولانا آفتاب عالم، مفتی علیم الدین قاسمی، ارشد انور الف، مفتی ہمایوں اقبال ندوی وغیرہ نے بھی احتیاطی تدابیر اختیار کرنے کی اپیل کرتے ہوئے شب برات میں گھروں میں عبادت کرنے اور قبرستان نہیں جانے کی اپیل کی ہے۔
