روی شنکر پرساد نے یہاں پٹنہ صاحب لوک سبھا کے بانکی پور اسمبلی حلقہ میں انتخابی مہم کے دوران کہا کہ صرف 15 دن اور باقی ہیں، اس کے بعد مسٹر مودی دوبارہ اکثریت کے ساتھ وزیر اعظم بنیں گے۔ لوگوں میں وزیر اعظم کے تئیں بے پناہ محبت اور پیار ہے جو علاقے میں عوامی رابطہ مہم کے دوران دیکھنے کو مل رہا ہے۔
بی جے پی لیڈر نے پٹنہ صاحب کے موجودہ ایم پی شتروگھن سنہا کا نام لئے بغیر کہا کہ انتخابی مہم کے دوران لوگوں نے بتایا کہ انہیں مفرور لیڈر نہیں چاہیے۔ گزشتہ ایک دہائی سے انہیں ایسے رہنما سے سابقہ پڑا جو پٹنہ ہی سے لاپتہ رہے اور ان کے سکھ دکھ میں جھانکنے تک نہیں آئے۔ انہوں نے لوگوں کو یقین دلایا کہ اب ایسا نہیں ہو گا کیونکہ وہ پٹنہ شہر کی زندگی سے جڑے ہوئے ہیں۔
پرساد نے کہا کہ مرکزی حکومت نے کسانوں کی آمدنی سال 2022 تک دوگنا کرنے کے لئے کثیر جہتی ہدف طے کیا ہے۔ مسٹر مودی کی حکومت نے گزشتہ 5 سالوں میں کسانوں کے مفاد اور فلاح و بہبود کے جتنے کام کئے اتنا کانگریس نے 55 سال کے دور اقتدار میں بھی نہیں کیا۔
