پٹنہ: آر جے ڈی کے صدر و بہار کے سابق وزیر اعلیٰ لالو پرساد یادو، شرد یادو کے انتقال کی خبر سے غمزدہ ہیں۔ سنگاپور میں کڈنی ٹرانسپلانٹ کے بعد صحت یاب ہونے والے لالو پرساد یادو نے شرد یادو کی موت پر ویڈیو پیغام جاری کرکے غم کا اظہار کیا۔ ہسپتال کے بستر پر انتہائی کمزور حالت میں نظر آنے والے لالو پرساد یادو نے ویڈیو پیغام میں کہا "شرد یادو جی، جو میرے بڑے بھائی کی طرح تھے، ان کے انتقال کی خبر سن کر بہت غمزدہ ہوں۔ میں بہت اداس ہوں اور گزشتہ دنوں کو یاد کر رہا ہوں۔' لالو یادو نے آگے کہا کہ شرد یادو، ملائم سنگھ یادو اور نتیش کمار اور بہت سے دوسرے لیڈروں نے ڈاکٹر رام منوہر لوہیا، جن نائک کرپوری ٹھاکر کے ساتھ مل کر ہم لوگوں نے سیاست شروع کی تھی۔
لالو یادو ویڈیو میں جذبات ہوتے ہوئے کہا کہ میں سنگاپور میں ہوں، اور آج اچانک مجھے خبر ملی کہ شرد یادو جی اب ہمارے درمیان نہیں ہیں۔ وہ بڑے سوشلسٹ اور صاف گو لیڈر تھے۔ ایوان میں یا ایوان سے باہر بھی تقریر کرنے کے معاملے میں شرد یادو اور میں کبھی کبھی جھگڑ بھی پڑتے تھے مگر اس لڑائی میں تلخی کا کوئی دوسرا پہلو نہیں ہوتا تھا۔ لالو یادو نے آخری میں کہا کہ شرد یادو جی اپنے لاکھوں دوستوں اور چاہنے والوں کو چھوڑ کر ہمارے درمیان سے اٹھ گئے۔ بھگوان سے دعا ہے کہ وہ ان کی روح کو سکون دے اور سوگوار خاندان کو یہ صدمہ برداشت کرنے کی طاقت دے۔
یہ بھی پڑھیں: Sharad Yadav Passes Away جے ڈی یو کے سابق صدر شرد یادو کا انتقال
واضح رہے کہ 12 جنوری 2023 کو جنتا دل یونائیٹڈ کے سابق صدر اور سابق مرکزی وزیر شرد یادو کا گروگرام کے فورٹس اسپتال میں انتقال ہو گیا۔ ان کی عمر 75 برس تھی۔ شرد یادو کی بیٹی سبھاشنی نے سوشل میڈیا پوسٹ میں اپنے والد کے انتقال کی اطلاع دی۔ بہار کی سیاست میں اپنی الگ پہچان رکھنے والے شرد یادو کے انتقال سے سیاسی گلیاروں میں غم کی لہر دوڑ گئی ہے۔ ان کی سوشلسٹ سیاست نے انہیں عوام میں مقبول بنایا تھا۔ بہار کے چار قدآور لیڈر لالو یادو، رام بلاس پاسوان، نتیش کمار اور شرد یادو جے پی تحریک کے نکلے ہوئے لیڈر کے طور پر شمار ہوتے ہیں۔
