بہار کے سب سے بڑے شہروں میں شمار" شہر گیا "پارکنگ کی وجہ سے سڑک جام و ٹریفک کے مسائل سے دوچار ہے۔ اس کے پیش نظر اب انتظامیہ ہر علاقے میں کم از کم ایک پارکنگ کے انتظام کرنے میں مصروف ہو گئی ہے۔
شہر گیا عالمی شہرت یافتہ شہر ہے۔ ملک و بیرون ملک سے لاکھوں کی تعداد میں عقیدت مند پنڈدان کے لیے وشنو پتھ آتے ہیں۔ مسلم برادری کے لوگ حضرت مخدوم درویش اشرف کی مزار پر ہر روز زیارت کے لیے ہزاروں کی تعداد میں پہنچتے ہیں۔ وہیں مہا بودھی مندر ہونے کی وجہ سے لاکھوں کی تعداد میں بودھ عقیدت مندوں کی بھی اس شہر میں آمد ہوتی ہے۔ ایک اندازے کے مطابق اس شہر میں ہر روز کروڑوں کی تعداد میں لوگ آتے ہیں۔
اس تعلق سے چیمبر آف کامرس کے سابق صدر و مگدھ انڈسٹری ایسوسی ایشن کے صدر انوپ کیڈیا کہتے ہیں کہ جام کی سب سے بڑی وجہ شہر میں پارکنگ کا نہیں ہونا ہے۔ شہر گیا کا سب سے بڑا تجارتی حلقہ جی بی روڈ، کے پی روڈ، گودام ایئریا، سیوراج پوری روڈ، رمنہ روڈ، پیر منصور روڈ جیسے کئی اہم علاقے ہیں جہاں ایک بھی پارکنگ نہیں ہے۔ افسوس کی بات تو یہ ہے کہ یہاں بڑے بڑے بینکوں کی خود کی عمارت ہے لیکن خود کی پارکنگ نہیں ہے، ان کے کسٹمر کی گاڑیاں سڑکوں پر کھڑی ہوتی ہیں۔
اس سلسلے میں میونسپل کارپوریشن کے کمشنر ساون کمار کہتے ہیں کہ شہر میں ایک بھی ایسی پارکنگ نہیں ہے، جو بڑے شہروں میں ہوتی ہے۔ یہاں کچھ راستے کو ہی پارکنگ زون بنایا گیا ہے۔ تاہم یہ عارضی معاملہ ہے۔ ڈسٹرکٹ سطح پر میٹنگ کرکے کیدار ناتھ مارکیٹ، گوداوری میدان، کٹھوکر تالاب میدان کو تین منزلہ پارکنگ بنانے کی تجویز محکمہ شہری ترقیات کو بھیجی گئی ہے۔
انہوں نے کہا کہ شہر میں خاص طور پر جی پی روڈ کے علاقے میں کسی بھی دکان اور بینکوں کے پاس پارکنگ نہیں ہے۔ اب تک چھ بڑی دوکانوں کو نوٹس کیا گیا ہے۔ ایسی کئی دوکانوں اور اداروں کی پہچان کی گئی ہے۔ گزشتہ دنوں میں وہ پارکنگ کا نظم نہیں کرتے ہیں تو انہیں پانچ لاکھ روپے تک کا جرمانہ بھرنا ہوگا۔
