ریاست بہار کے ضلع ارریہ میں آج صبح سے تیسرے مرحلے کے لئے ہو رہے ووٹنگ میں ووٹروں کا جوش دیکھنے کو مل رہا ہے، امیدوار بھی پرجوش ہو کر پولنگ مرکز پر اپنے حق رائے دہی کا استعمال کر رہے ہیں، جوکی ہاٹ سے آر جے ڈی کے امیدوار و سابق رکن پارلیمان سرفراز عالم نے گرلز ہائی اسکول پہنچ کر اپنے حق رائے دہی کا استعمال کیا اور اپنی جیت کو یقینی بتایا۔
اس دوران صحافیوں سے گفتگو کرتے ہوئے سرفراز عالم نے کہا کہ میں صرف سیمانچل گاندھی کا ہی بیٹا نہیں ہوں بلکہ پورے سیمانچل کا بیٹا ہوں، اس سے قبل بھی یہاں کے لوگوں نے مجھے چار بار اسمبلی بھیجا ہے اور اس بار بھی امید ہے کہ لوگ تمام چیزوں سے اوپر اٹھ کر ووٹ کریں گے۔
انہوں نے کہا کہ اس وقت پورے بہار میں تبدیلی کی ایک لہر دوڑ رہی ہے، لوگوں نے ٹھان لیا ہے کہ اس بار تیجسوی یادو کو ہی وزیر اعلیٰ بنانا ہے۔
سرفراز عالم نے کہا کہ جوکی ہاٹ میں مقابلہ کسی سے نہیں ہے، کچھ لوگ ہیں جو باہر کی پارٹی کی حمایت کر رہے ہیں، تاہم انہیں معلوم ہے کہ حکومت تیجسوی یادو کی آ رہی ہے اس لیے اپنا نمائندہ بھی ایسے لوگوں کو منتخب کرے گی جس سے جوکی ہاٹ کا فلاح و بہبود ہو سکے، تیجسوی یادو نے کہا ہے کہ اگر ان کی حکومت آتی ہے تو جوکی ہاٹ کو سب ڈویژن کا درجہ دیا جائے گا۔
