ضلع گیا کے اے آئی ایم آئی ایم کے رہنما کو جے ڈی یو نے غلط فہمی کی وجہ سے اقلیتی سیل کا جنرل سکریٹری نامزد کردیا ہے، جس کو لے کر اے آئی ایم آئی ایم کے رہنما نے ناراضگی کا اظہار کیا ہے۔
ایم آئی ایم کا کہنا ہے کہ 'جے ڈی یو کے جنوبی بہار کے اقلیتی سیل کے صدر الیکزنڈر خان کا تعلق گیا ضلع سے ہے اور انہوں نے ہی آل انڈیا مجلس اتحاد المسلمین کے ضلعی صدر شاہد اقبال خان کو ریاست کا جنرل سیکرٹری منتخب کیا ہے۔'
دراصل جے ڈی یو جنوبی بہار اقلیتی سیل کمیٹی کی تشکیل پر تنازعہ ہو گیا ہے کمیٹی کی تشکیل کے ساتھ ہی سوال اٹھنے لگے ہیں کہ کیا جے ڈی یو سے مسلمانوں کا جھکاؤ کم ہوگیا ہے؟ یا پھر ان کے ساتھ مسلم کارکن اور رہنماؤں کی کمی ہوگئی ہے؟
اس تعلق سے اے آئی ایم آئی ایم کے رہنما شاہد اقبال خان کا کہنا ہے کہ 'جے ڈی یو کا مگدھ زون میں کوئی وجود بچا نہیں ہے یہی وجہ ہے کہ گزشتہ اسمبلی انتخابات میں یہاں سے کسی بھی سیٹ پر جیت حاصل نہیں ہوسکی ہے، جے ڈی یو دوسری پارٹیوں کے رہنما کا نام دے کر اپنی فہرست مکمل کررہی ہے۔'
یہ بھی پڑھیں: یوپی میں 100 سیٹوں پر الیکشن لڑیں گے: اسدالدین اویسی
حالانکہ اس سلسلے میں جنوبی بہار اقلیتی سیل کے صدر الیکزنڈر خان نے کہا ہے کہ 'پرنٹنگ کی غلطی کی وجہ سے یہ معاملہ پیش آیا ہے۔ در اصل شاہد اقبال خان پہلے جے ڈی یو میں شامل تھے بعد میں انہیں پارٹی نے نکال دیا تھا۔
انہوں نے کہا کہ 'اس مرتبہ شہر گیا کے رہنے والے دوسرے شاہد خان کو جنرل سیکرٹری نامزد کیا گیا لیکن ان کے نام کی جگہ پر شاہد اقبال خان کا نام چھپ گیا ہے۔ یہ کوئی بڑا مسئلہ نہیں ہے۔
