'رہتی دنیا تک قرآن کے حفاظت کی ذمہ داری اللہ رب العالمین نے لی ہے'

حالیہ دنوں متنازع بیانوں کے لیے مشہور اور یوپی شیعہ سینٹرل وقف بورڈ کے سابق چیئرمین وسیم رضوی کی گھٹیا اور بدترین بیان کی آج ہر چہار جانب مذمت ہو رہی ہے۔

وسیم رضوی نے قرآن کریم کی 26 آیات کو قرآن سے ہٹانے کی عرضی سپریم کورٹ میں داخل کرتے ہوئے کہا ہے کہ یہ آیات دہشت گردی کو فروغ دیتا ہے۔ وسیم رضوی کے مذکورہ بیان کی ہر مسلک و مشرب کے علماء کرام و دانشوران کی جانب سے مذمت ہو رہی ہے اور اسے صرف ایک پبلی سٹی اسٹنٹ اور سیاسی مفادات حاصل کرنے کا حربہ بتا رہے ہیں۔

دارالقضاء امارت شرعیہ ارریہ کے قاضی شریعت مولانا قاضی عتیق اللہ رحمانی نے کہا کہ قرآن تا قیامت باقی رہنے والی ایک معجزاتی کتاب ہے۔ اس کتاب پر بلاتفریق تمام مسالک خواہ وہ شیعہ ہوں، سنی ہوں، دیوبندی ہوں ، بریلوی ہوں ، اہل حدیث ہوں ، بوہرہ ہوں یا پھر کسی بھی فرقہ سے تعلق رکھتے ہوں. وسیم رضوی کے اس بیان کی خود شیعہ حضرات نے بھی اسلام دشمن سے تعبیر کیا ہے اور کہا ہے ان کا شیعیت سے کوئی تعلق نہیں ہے۔

مدرسہ اسلامیہ یتیم خانہ کے استاذ مفتی انعام الباری قاسمی نے وسیم رضوی کے مطالبہ کو سرے سے مسترد کرتے ہوئے کہا کہ وسیم رضوی ملک کے امن و آمان اور فضا کو بگاڑنے کی کوشش کر رہے ہیں. حکومت کو اس پر روک لگا کر کارروائی کرنی چاہیے۔

جمعیۃ علماء ارریہ کے نائب صدر مولانا شاہد عادل قاسمی نے کہا کہ وسیم رضوی کا بیان جھوٹ اور انتشار والا ہے۔ جس قرآن پاک کے حفاظت کی ذمہ داری خود اللہ پاک نے لے رکھی ہے۔

قرآن حکیم کا ایک ایک لفظ صادق پرمبنی ہے. وسیم رضوی جیسے بدبخت لوگ معاشرے کے لئے ناسور اور ناساز ہے. مدرسہ اسلامیہ یتیم خانہ کے استاذ مفتی ہمایوں اقبال ندوی نے کہا کہ وسیم رضوی کے بیان کی جتنی مذمت کی جائے کم ہے۔

ان کا یہ بیان کوئی نیا نہیں ہے اس سے قبل بھی وہ سستی شہرت کے لئے متنازعہ بیان دیتے رہے ہیں، ہم عوام سے مودبانہ درخواست کرتے ہیں وہ جذبات سے نہیں بلکہ صبر و تحمل سے کام لیں۔