نالندہ: بہار کے پھلوای شریف تھانہ علاقے میں اطہر پرویز اور جلال الدین کو پی ایف آئی کی مبینہ سرگرمیوں میں ملوث پائے جانے پر گرفتار کیا گیا ہے، وہیں ان کے پاس سے کئی دستاویزات بھی برآمد ہوئے ہیں، دستاویزات کی جانچ کرتے ہوئے پولیس نے اس معاملے میں مزید کئی لوگوں کو ملزم بنایا ہے جن کے رابطے نالندہ ہیڈ کوارٹر کے بہار شریف سے بتائے جارہے ہیں۔نالندہ کے سوہسرائے تھانہ علاقہ کے محمد وسیم الدین کے بیٹے شمیم اختر کا نام بھی مبینہ ملک مخالف سازش کرنے میں سامنے آیا ہے۔ جس کے بعد آئی بی کی اسپیشل ٹیم شمیم کے گھر پہنچ کر جانچ بھی کی۔ تاہم شمیم کو گرفتار نہیں کیا جا سکا کیونکہ وہ گھر پر موجود نہیں تھے۔
اس سے قبل اسمبلی انتخابات کے دوران بھی شمیم کا نام کافی سرخیوں میں رہا تھا۔ کیوں وہ کئی مرتبہ حکومت مخالف مظاہروں میں نظر آئے ہیں۔ اس وقت وہ ایس ڈی پی آئی کے ریاستی صدر ہیں۔ فی الحال پولس پورے معاملے کی جانچ کر رہی ہے۔ ذرائع کے مطابق آئی بی کی خصوصی ٹیم تحقیقات میں مصروف ہے اور شمیم کی گرفتاری کے بعد ہی خلاصہ ہوگا۔ تاہم شمیم کے گھر والے اور علاقے کے لوگ کچھ نہیں کہہ رہے ہیں اور نہ ہی کوئی ویڈیو بنانے کی اجازت دے رہے ہیں۔
ساتھ ہی پولیس کی مختلف ٹیمیں اس معاملے میں گرفتار اطہر پرویز اور جلال الدین سے پوچھ گچھ میں مصروف ہیں۔ پولیس کے مطابق جس گھر میں وہ رہتے تھے وہاں مارشل آرٹس اور فزیکل ایجوکیشن کے نام پر ہتھیاروں کے استعمال کی تربیت دی جاتی تھی۔ اس کے علاوہ ان دونوں پر مذہبی نفرت پھیلانے اور شدت پسندانہ کارکردگی کی بھی بات سامنے آئی ہے۔ تربیتی پروگرام میں بہت سے لوگوں کو خفیہ طریقے سے تربیت دی گئی ہے۔ تربیت میں شامل افراد کو ہدایت کی گئی کہ وہ اپنے اپنے علاقوں میں جا کر زیادہ سے زیادہ لوگوں کو تربیت دیں اور ان کی حوصلہ افزائی کریں۔ جب ان کے ٹھکانوں پر چھاپہ مارا گیا تو پولیس کو پی ایف آئی کا جھنڈا، پمفلٹ، کتابچے اور خفیہ دستاویزات ملے۔ جس میں بھارت کو 2047 تک اسلامی ریاست بنانے کی مہم سے متعلق دستاویزات برآمد ہوئی ہیں۔
یہ بھی پڑھیں: Former Inspector Jalaluddin Arrested : گرفتار پی ایف آئی کارکن جلال الدین کا پولیس سروس ریکارڈ صاف ستھرا ہے
