سبکدوش میجر جنرل گنگا دیپ بخشی کے خلاف پٹنہ میں مقدمہ درج کیا گیا ہے۔ انہوں نے ہندوستانی عوام مورچہ کے ترجمان دانش رضوان کو ایک ٹی وی ڈیبیٹ کے دوران جان سے مارنے کی دھمکی دی تھی۔
ہندوستانی عوامی مورچہ کے ترجمان دانش رضوان نے ای ٹی وی بھارت سے بات کرتے ہوئے کہا کہ ایک ٹی وی ڈیبیٹ کے دوران سبکدوش میجر جنرل گنگا دیپ بخشی نے ان کے خلاف بدکلامی کرتے ہوئے انہیں جان سے مارنے کی دھمکی دی۔
دانش نے بتایا کہ اس پروگرام میں یہ بار بار کہہ رہے تھے کہ بھارت چین پر حملہ کرنے جارہا ہے۔ جب ہم نے ان سے پوچھا کہ کب حملہ کرے گا۔جب ملک کے وزیراعظم، وزیر دفاع اور وزیر داخلہ کو یہ پتا نہیں ہے۔ اور آپ کہہ رہے ہیں کہ بھارت چین پر حملہ کرنے جا رہا ہے۔ اسی بات پر وہ بھڑک اٹھے اور مجھ سے بدکلامی اور جان سے مارنے کی دھمکی دی۔
دانش نے بتایا کہ میں نے ان کے خلاف مقدمہ درج کرایا ہے۔ اور حکومت سے مطالبہ کیا ہے کہ انہیں گرفتار کرکے بہار لایا جائے۔
