ارریہ میں سول کورٹ کی جانب سے ہر تین ماہ میں منعقد ہونے والا راشٹریہ لوک عدالت کا افتتاح ضلع کلکٹر بیجناتھ یادو کے ذریعہ انجام پایا۔
راشٹریہ لوک عدالت کا افتتاح ایڈیشنل سیشن جج (اول) سنجے کمار و ایڈیشنل جج (چہارم) ابھیشک کمار نے شمع روشن کر کے کیا۔ اس موقع پر کورٹ احاطہ میں کل نو کاؤنٹرز لگائے گئے جہاں بڑی تعداد میں لوگ کورٹ میں زیر التوا اپنے اپنے معاملات کو حل کرانے پہنچے۔
ایڈیشنل جج سنجے کمار نے کہا کہ ' ہر تین ماہ میں منعقد ہونے والے اس لوک عدالت کا فائدہ لوگوں کو زیادہ سے زیادہ اٹھانا چاہیے تاکہ بروقت ان کے مسائل کا تصفیہ کیا جاسکے'۔
انہوں نے کہا کہ ' ہماری کوشش ہے کہ لوک عدالت میں فریقین کے درمیان بغیر کسی تاخیر اور کسی تاریخ کے دونوں کے درمیان معاملے کو سلجھا لیا جائے، یہی وجہ ہے کہ بڑی تعداد میں عوام اس میں پہنچتی ہے اور معاملے کا حل چاہتی ہے۔'
ضلع کلکٹر بیجناتھ یادو نے اس طرح کے کیمپ لگائے جانے پر خوشی کا اظہار کیا اور کہا کہ جہاں لوگ مہینوں عدالت کا چکر لگاتے ہیں وہیں اس کیمپ کے ذریعہ سے اپنے معاملات کو فوری حل کرا سکتے ہیں۔
بیجناتھ یادو کے مطابق ' ضرورت اس بات کی ہے کہ ایسی چیزوں کو زیادہ سے زیادہ عام کیا جائے تاکہ مزید لوگ اس کیمپ سے فائدہ اٹھا سکیں۔'
مزید پڑھیں : این آر سی کے تعلق سے عوام میں بیداری لانا وقت کی اہم ضرورت
اس لوک عدالت میں جن معاملات کو سلجھانے کی کوشش کی جائے گی ان میں جرائم سے متعلق کیسز، رقم وصولی معاملہ، بینک سے لیا گیا قرض ، بجلی کنیکشن معاملہ، شادی بیاہ کا تنازع، زمینی معاملہ اور پینشن معاملہ شامل ہے۔
اس طرح کے لوک عدالت کے منعقد ہونے پر عوام میں خوشی دیکھی گئی، مقامی افراد کا کہنا ہے کہ کورٹ انتظامیہ کی یہ ایک اچھی کوشش ہے۔ اس طرح کے کیمپ لگانے سے عوام کو راحت ملے گی، اور قانون پر عمل آواری سے جرائم پیشہ عناصر کے حوصلے ٹوٹیں گے۔
