گذشتہ کل سے ہی یعنی 10 اکتوبر 2019 سے تمام ریاستوں میں آن لائن درخواست لینے کا سلسلہ شروع ہوگیا۔ مرکز کے زیر انتظام علاقہ جموں و کشمیر کے عازمین حج فی الوقت اس سہولت سے محروم رہیں گے کیوں کہ وہاں انٹرنیٹ پر پابندیاں عائد ہیں۔
بہار ریاستی حج کمیٹی نے آن لائن درخواست لینے کا سلسلہ شروع کردیا ہے، آج پہلے روز تقریباً آٹھ عازمین حج نے درخواست دی ہے۔ ریاستی حج کمیٹی کے دفتر میں پٹنہ کے پہلے تین عازمین حج 2020 کے لیے ریاست بہار سے درخواست جمع کرائی۔ ان میں پہلے عازم حج اپنی اہلیہ سلمہ بانو کے ہمراہ فریضہ حج کی ادائیگی کے خواہشمند ہیں۔ تیسرے نوجوان سید ضیاءالحق ہیں جنہوں نے درخواست دی ہے۔
ریاستی حج کمیٹی کے چیئرمین الیاس احمد عرف سونو بابو نے ای ٹی وی بھارت سے خصوصی ملاقات میں کہا کہ حج 2020 کا آغاز اقلیتی امور کے مرکزی وزیر مختار عباس نقوی نے بہت پہلے کر دیا ہے۔ انہوں نے کہا کہ ملک کی بیشتر ریاستوں میں سیلاب سے لوگ پریشان ہیں، اسی درمیان وزیر موصوف نے تقریباً نو ماہ قبل ہی اس کا آغاز کردیا۔ وہ بہت جلد مرکزی حج کمیٹی سے تاریخ میں توسیع کا مطالبہ کریں گے۔
ایک سوال کے جواب میں ریاستی حج کمیٹی کے چیئرمین نے کہا کہ ریاستی حج کمیٹی حج 2020 کے لئے پوری طرح تیار ہے۔ اس بار ساری توجہ ریاست کے کوٹے کو پُر کرنے کی کوشش پر ہوگی، واضح ہو کہ ریاست کا کوٹہ 10000 سے زائد ہے، لیکن ہر بار ریاست بہار کے کوٹے کا نصف حصہ بچا رہ جاتا ہے۔
چیئرمین الیاس احمد عرف سونو بابو نے آئندہ 12 تاریخ کو ایک اہم میٹنگ طلب کی ہے، جس میں پوری ریاست کے مساجد کے ائمہ اور اضلاع کمیٹیوں کے افراد موجود ہوں گے۔ اس میں زیادہ سے زیادہ لوگوں میں ترغیب حج کا پروگرام چلانے اور آئندہ کا لائحہ عمل تیار کیا جائے گا۔
