ریاست بہار میں ضلع گیا کے ڈوبھی روڈ پر واقع آفیسرز ٹریننگ اکیڈمی 'او ٹی اے' میں ہفتے کے روز 17 ویں پاسنگ آؤٹ پریڈ کا اہتمام کیا گیا۔
پاسنگ آوٹ پریڈ میں کل 17 جنٹلمین کیڈٹس نے حصہ لیا، اس دوران او ٹی اے کمانڈنٹ سنیل سریواستو نے پریڈ کی سلامی لی۔
اس موقع پر آفیسرز ٹریننگ اکیڈمی کے متعدد آفیسرز اور ان کے اہل خانہ بھی موجود تھے۔ جنٹلمین کیڈٹس نے ایک دوسرے کے ساتھ مل کر فوجی دھن پر پریڈ کیا۔
پاسنگ آوٹ پریڈ میں موجود لوگوں سے خطاب کرتے ہوئے کمانڈنٹ سنیل سریواستو نے کہا کہ 'آج او ٹی اے میں 17 کیڈٹس پاس ہوئے ہیں۔ یہ تمام مختلف اداروں میں ٹریننگ لے کر فوج کے سینیئر افسر بن جائیں گے اور ملک کی خدمت کریں گے، ہم ان کے روشن مستقبل کی امید کرتے ہیں۔'
کمانڈنٹ نے بتایا کہ یہاں سے 81 ائیر کیڈٹس کو پاس کیا جانا تھا لیکن کووڈ-19 کی وجہ سے وہ اپنے منتخب کیے ہوئے مختلف انجینئرنگ فوجی اداروں میں کمیشن حاصل کر رہے ہیں۔ ہمیں ان پر بھی بہت زیادہ فخر اور خوشی ہے۔انہوں نے کہا کہ اس مرتبہ کووڈ-19 کی وجہ سے بہت سارے کیڈٹس کے والدین اس تاریخی لمحے کو دیکھنے نہیں آسکے جس کا ہمیں افسوس ہے۔
کمانڈنٹ سنیل سریواستو نے بتایا کہ اس مرتبہ پاس آؤٹ کا انعقاد کورونا کی وجہ سے ایک سادہ انداز میں کیا گیا ہے۔انہوں نے جنٹلمین کیڈٹس اور ان کے سرپرستوں سے بھی اپیل کی ہے کہ وہ کورونا دور میں صفائی اور سماجی دوری برقرار رکھیں۔
تربیت کے دوران عمدہ کارکردگی کا مظاہرہ کرنے والے کیڈٹس وِپول سنہا کو چاندی کا تمغہ بھی دیا گیا۔
ویپل سنہا نے کہا کہ ہماری کامیابی کا سہرا ہمارے والدین اور تربیت کے افسران کو جاتا ہے جن کی وجہ سے ہی آج ہم اس مقام پر پہنچ سکے ہیں۔
انہوں نے مزید کہا کہ نوجوانوں کو ہمیشہ ملک کی خدمت کے لیے تیار رہنا چاہئے، یہ ضروری نہیں ہے کہ کوئی صرف وردی پہن کر ہی ملک کی خدمت کر سکتا ہے بلکہ وردی کے بغیر بھی ملک کی خدمت کی جاسکتی ہے، وپول سنہا کا تعلق آسام کے کریم گنج سے ہے۔
