گیا کے اتری اسمبلی حلقہ کے ایک بڑے سیاسی گھر کی گارجین اور سابق رکن اسمبلی کنتی دیوی کا پٹنہ پی ایم سی ایچ میں علاج کے دوران انتقال ہوگیا، انہیں کئی دنوں سے ڈائلسیس پر رکھا گیا تھا۔
اطلاع کے مطابق انہیں گردہ کی بیماری کافی دنوں سے تھی اور ان دنوں وہ کورونا سے بھی متاثر ہوگئی تھیں۔رواں برس جنوری میں ہی گیا سول کورٹ نے کنتی دیوی کو جے ڈی یو رہنما سمارک یادو قتل کے الزام میں عمر قید کی سزا سنائی تھی۔ اس دوران انہوں نے بیماری کا حوالہ دیکر گیا سول کورٹ اور پٹنہ ہائی کورٹ میں ضمانت کی عرضی دائر کی تھی، تاہم اس عرضی کو خارج کردیا گیا تھا، جس کے بعد وہ اورنگ آباد کے داود نگر جیل میں بند تھیں۔
کنتی دیوی کا 67 برس کی عمر میں انتقال ہوا ہے. 2020 کے اسمبلی انتخابات میں کنتی دیوی نے بیماری کا حوالہ دیتے ہوئے خود الیکشن لڑنے سے منع کر دیا تھا۔ انہوں نے اپنی جگہ پر اپنے بیٹے رنجیت یادو کو ٹکٹ دلوایا اور انہیں اتری اسمبلی حلقہ سے جیت دلوا کر اسمبلی تک پہنچایا۔ رنجیت یادو راشٹریہ جنتا دل کی ٹکٹ پر رکن اسمبلی ہیں، جبکہ کنتی دیوی یادو کے شوہر راجندر یادو بھی اتری اسمبلی حلقہ سے تین مرتبہ جیت درج کر چکے ہیں۔
راجندر یادو ایک لڑکی کے قتل کے الزام میں جیل میں عمر قید کی سزا کاٹ رہے ہیں۔راجندر یادو اپنے علاقے کے دبنگ مانے جاتے تھے. انکے جیل جانے پر انکی بیوی کنتی دیوی نے ہی سیاسی اور گھریلو ذمہ داریاں سنبھالی تھی۔
