ارون کمار نے یہاں بدھ کو پارٹی کے ریاستی دفتر میں منعقدہ پریس کانفرنس میں کہاکہ 11 سال قبل ایس ٹی ای ٹی امتحان اسی قومی جمہوری اتحاد (این ڈی اے) کی مدت کار میں ہوا تھا۔ امتحان کے نتائج آنے کے بعد بھی امیدوار انتظار کرتے رہے لیکن حکومت کی جانب سے انصاف پر مبنی جواب نہیں ملا ۔ اسی بے اطمینانی کو لیکر امیدوار جب کل دار الحکومت پٹنہ میں مظاہرہ کر رہے تھے تب پولیس کی جانب سے ان پر لاٹھی چارج کیا گیا ۔ انہوں نے الزام عائد کیاکہ بدعنوانی اور سیاسی ناکامی کی وجہ سے ہی امیدواروں میں عدم اطمینان کی کیفیت پیدا ہوگئی ہے ۔
سابق رکن پارلیمنٹ نے کہاکہ جن امیدواروں پر لاٹھی چارج کیا گیا وہ کل کے مستقبل کے معمار ہیں۔ ایک ساز ش کے تحت حکومت تعلیم کے مندر کو منہدم کرنے میں مصروف ہے تبھی تو 11 سال قبل لئے گئے امتحان کا نتیجہ ابھی تک اندھیرے میں ہے ۔ انہوں نے طنزکرتے ہوئے کہاکہ اگر کوئی گیارہ سال تک ایم ایل اے اور اور ایم پی نہیں بنتے تو کئی بار پارٹیاں بد ل دیئے ہوتے ۔
ارون کمار نے کہاکہ پہلے لوگ اساتذہ کا استقبال کرتے تھے لیکن سوشاسن کی حکومت میں ان پر لاٹھی چارج کروائے جارہے ہیں۔ اس سے قبل بھی اپنے مطالبات کی حمایت میں مظاہرہ کررہی خواتین اساتذہ پر بھی لاٹھی چارج کئے گئے تھے۔
انہوں نے کہاکہ ایس ٹی ای ٹی امیدوار گذشتہ 11 سال سے انتظار کر رہے تھے اور اس کے بعد وزیر تعلیم وجے کمار چودھری انہیں صبر وتحمل کا مظاہرہ کرنے کوکہہ رہے ہیں یہ مضحکہ خیز ہے۔
یہ بھی پڑھیں: ماب لنچنگ کا معاملہ، امارت شرعیہ کا وفد ارریہ پہنچا
یواین آئی
