بہار اسمبلی انتخابات کے دوران ریاست کی تمام سیٹوں میں سے ضلع دربھنگہ کی جالے سیٹ سب سے ہاٹ مانی جارہی ہے کیونکہ اس سیٹ پر کانگریس اور بی جے پی کے درمیان سخت مقابلہ ہے۔
جالے حلقہ اسمبلی سے علی گڑھ طلبأ یونین کے سابق صدر مشکور احمد عثمانی کو کانگریس نے بطور امیدوار کھڑا کیا ہے جبکہ بی جے پی کے موجودہ رکن اسمبلی جبیش کمار کو پارٹی نے اس بار بھی ٹکٹ دیا ہے۔
واضح رہے کہ مشکور احمد عثمانی جب علی گڑھ مسلم یونیورسٹی میں زیر تعلیم تھے تب ان پر بانی پاکستان محمد علی جناح کی تصویر اپنے کمرے میں رکھنے کا الزام عائد کیا گیا تھا۔
اس بات کو لے کر بی جے پی ہر بار ان پر نکتہ چینی کرتے رہتی ہے اور ان پر جناح نظریات کا حامل ہونے کا بھی الزام لگاتے رہتی ہے۔
مشکور احمد عثمانی جب سے انتخابی میدان میں اترے ہیں تب ہی جالے حلقہ اسمبلی پوری ریاست میں موضوع بحث بنا ہوا ہے۔
اس تعلق سے بی جے پی کے موجودہ رکن اسمبلی جبیش کمار کا کہنا ہے کہ عثمانی ان کی برابری کے نہیں ہیں اور سات نومبر کو عوام یہ بات ثابت کردے گی۔
واضح رہے کہ جالے حلقہ اسمبلی ایک ایسی سیٹ رہی ہے جہاں سے تقریباً سبھی پہچان والی پارٹیوں کے امیدواروں نے فتح حاصل کی ہے۔
