ریاست بہار کے ضلع ارریہ میں جمعیۃ علماء ہند کی ممبر سازی مہم کے بعد ان دنوں ضلع کے تمام بلاکس میں بلاک کمیٹیوں کا انتخابی عمل جاری ہے، اسی کے تحت سکٹی، جوکی ہاٹ اور پلاسی بلاکس کے لئے جمعیۃ علماء ہند کی کمیٹیوں کے انتخابات کا عمل بحسن و خوبی اور پرسکون ماحول میں اختتام پذیر ہوا۔
سکٹی بلاک کی کمیٹی کا انتخاب دارالعلوم محمودیہ کالج چوک برداہا سکٹی میں مولانا داؤد عالم نعمانی اور مولانا مشتاق احمد صدیقی کی نگرانی میں ہوا، جس میں جمعیۃ علما سکٹی بلاک کے لئے مولانا محمد ہلال قمر مفتاحی صدر اور مولانا اکرام الدین نعمانی سکریٹری منتخب کئے گئے۔
اس موقع پر مولانا مشتاق صدیقی نے کہا کہ کسی بھی تنظیم کے استحکام اور دائرے کار میں توسیع کے لئے افراد کی ضرورت ہوتی ہے، جس جماعت میں افراد زیادہ ہوتے ہیں وہ جماعت پوری مضبوطی کے ساتھ آگے بڑھتی ہے اور ملک اور قوم و ملت کے فلاح و بہبود کے لئے پورے استحکام کے ساتھ کام کرتی ہے اور ساتھ ہی برسر اقتدار حکومت ایسی مضبوط تنظیم اور جماعت کا بڑا احترام کرتی ہے اور اس سے قوم ملت میں اتحاد پیدا ہوتا ہے۔
وہیں دوسری جانب جمعیۃ علماء جوکی ہاٹ بلاک کے لئے قاری محمد امتیاز احمد صدر اور قاری کاشف سکریٹری کے عہدے کے لئے منتخب ہوئے، وہیں دیگر امیدواروں میں نائب صدور کے لئے مولانا وسیم قاسمی اور مولانا سفیان قاسمی کا نام شامل ہے، اسی طرح جمعیۃ علماء پلاسی بلاک کے لئے مفتی نعمان اختر نعمانی صدر اور قاری احتشام الحق سکریٹری کے لئے منتخب ہوئے۔ یہاں نگراں کے طور پر مولانا عبد السلام ندوی اور قاری کاشف نسیم شریک ہوئے۔
ان تمام عہدیداروں کے منتخب ہونے پر جمعیۃ علماء ہند ضلع ارریہ کے جنرل سکریٹری مفتی اطہر القاسمی نے مبارکباد پیش کرتے ہوئے کہا کہ ان حضرات سے جمعیۃ علماء ہند کی بہتر از بہتر خدمات کی امید ہے۔
