ریاست بہار کے ضلع گیا میں یوم جمہوریہ کاجشن جوش وخروش کے ساتھ منایا گیا جس میں بہار کے وزیرتعلیم کرشنندن پرساد ورما نے گیا کے گاندھی میدان میں پرچم کشائی کی ۔ اور عوام کو خطاب کرتے ہوئے عظیم مجاہدین آزادی کے شہیدوں کو یاد کیا اورملک کے باشندوں کو یوم جمہوریہ کی مبارک بادپیش کی ۔
انہوں نے اس موقع پر ضلع میں ہورہے ترقیاتی کاموں کو بتاتے ہوئے کہا کہ معاشرے کے موجودہ برائیوں کے خاتمے اور جل جیون ہریالی منصوبہ کے فروغ کے لئے حکومت نے جو مہم چلائی تھی ،اس کڑی کو ضلع کے بیس لاکھ لوگوں نے انسانی زنجیر بنا کر پرزور حمایت کی ہے ۔
اس مہم کو بہار کی تاریخ کے سنہرے ورق میں درج کیا جائے گا، انہوں نے صحت، تعلیم،سماجی تحفظ وظیفہ، فلاح و بہبود، زراعت اور دیگر محکموں کی طرف سے کئے گئے کاموں کے سلسلے میں بھی عوام کو بتایا ۔
انہوں نے کہا کہ حکومت اقتصادی طور پر پسماندہ لوگوں کو آگے بڑھانے کے لئے ہر ممکن کوشش کر رہی ہے، اور ترقی کی اس دور میں بہار کو آگے لے جانے کے لئے ہرفرد کے تعاون کی ضرورت ہے۔
اس خطاب کے بعد وزیرتعلیم نے پریڈ میں نمایاں کردار پیش کرنے والے جوانوں و بچوں کی حوصلہ افزائی کرتے ہوئے اعزاز سے نوازا۔
