بہار کے معروف عالمِ دین اور تعلیم دوست حضرت مولانا مفتی محفوظ الرحمٰن نے اپنی زندگی کو قوم کے لیے وقف کیا تھا ان کے انتقال پر ملال سے ضلع گیا کے علماء کرام، ائمہ مساجد، ڈاکٹر اور تعلیمی دوستوں نے گہرے رنج وغم کا اظہار کیا ہے۔
شہر گیا کے مشہور آرتھو پیڈک سرجن ڈاکٹر فراست حسین نے کہا کہ مفتی محفوظ الرحمٰن قاسمی ہمیشہ قوم کے بچوں کی تعلیم و تربیت جاری رکھنے کے لیے جدوجہد میں تھے. مفتی علیہ الرحمہ نہ صرف دینی تعلیم بلکہ عصری تعلیم کے لیے بھی زور دیتے تھے. ان کا ماننا تھا کہ جب تک پسماندہ علاقوں میں تعلیم کی طرف رجحان نہیں ہوگا تب تک ہماری غربت دور نہیں ہوگی اور ہماری قوم ترقی یافتہ قوم کی قطار میں کھڑی نہیں ہوگی. مدرسے میں عصری تعلیم پر فوکس کیا تاکہ مدرسے کے بچے بھی ڈاکٹر، انجینیئر بنیں اور دنیا کے بہترین عہدوں پر فائز ہوں۔
ڈاکٹر فراست حسین نے کہا کہ چونکہ وہ بھی بہار کے ایک قدیم یتیم خانہ چیرکی گیا کے صدر ہیں. اس لیے وہ تعلیم سے جڑے افراد کو فالو کرتے ہیں اور ان کے ادارے کے نظام کو سمجھتے ہیں تاکہ وہ قدیم یتیم خانے کو بہتر ڈھنگ سے چلا سکیں۔
مشہور فزیشن ڈاکٹر ایس زیڈ احسن نے بھی گہرے رنج وغم کا اظہار کیا اور کہا کہ زمانہ اسی کی یاد میں آنسو بہاتا ہے جس نے زندگی میں دوسروں کو سنوارنے اور بنانے میں اپنی خدمات انجام دی ہوں، اس کورونا وبا نے ہم سے ہمارے جید علماء، ماہر ڈاکٹرز، انجینیئر اور سماجی کارکن اور ویسی شخصیت جو ملک اور یہاں کے باشندوں کی فلاح و بہبود خواہ ان کا کسی بھی شعبہ سے تعلق ہو، ویسی شخصیت کو چھینا ہے، اب ہماری کوشش ہونی چاہیے کہ اب ان حضرات کے مشن کو ہم آگے بڑھائیں۔ ان کے اداروں کو مزید مستحکم بنانے میں اپنا تعاون پیش کریں۔
جامعہ ام القریٰ کے ناظم اعلیٰ قاری غضنفر قاسمی، مدرسہ ترتیل القرآن پنہر مسجد کے ناظم مولانا عظمت اللہ ندوی، قاری قدرت اللہ، مولانا محفوظ الرحمٰن قاسمی نے بھی مولانا کی وفات پر گہرے رنج وغم کا اظہار کیا اور کہا کہ وہ دکھ کی اس گھڑی میں اہل خانہ کے غم میں برابر کے شریک ہیں، اللہ تعالیٰ مرحوم کے درجات بلند فرمائے اور کروٹ کروٹ جنت عطا فرمائے۔
